ചേലക്കരയിൽ ഇടതുമുന്നണി മദ്യവും പണവും ഒഴുക്കുന്നു; ചെറുതുരുത്തിയിൽ കിട്ടിയ പണം ആരുടേത്, വിലക്ക് ലംഘിച്ച് അൻവറിന്റെ വാർത്താസമ്മേളനം

തൃശൂർ: ഉപതെരഞ്ഞെടുപ്പ് നടക്കുന്ന ചേലക്കരയിൽ ഇടതുമുന്നണി മദ്യവും പണവും ഒഴുക്കി വോട്ട് പിടിക്കുകയാണെന്ന് പി.വി അൻവർ എംഎൽഎ. കോളനികൾ കേന്ദ്രീകരിച്ചാണ് ഇടതുമുന്നണിയുടെ പണം വിതരണം. കവറിലാക്കി നൽകുന്ന സ്ലിപ്പിനൊപ്പം പണവും കൂടി വച്ചാണ് വിതരണം ചെയ്യുന്നതെന്ന് അൻവർ പറഞ്ഞു. ചേലക്കരയിൽ പോലീസ് വിലക്ക് ലംഘിച്ചായിരുന്നു പി.വി അൻവർ എംഎൽഎയുടെ വാർത്താസമ്മേളനം.

ചെറുതുരുത്തിയിൽ നിന്നും25 ലക്ഷം രൂപ പിടികൂടിയിട്ടുണ്ട്. ഈ പണം ആരുടേതാണെന്ന് ചോദിച്ച അൻവർ അവിടെ മരുമോനല്ലോ ക്യാമ്പ് ചെയ്യൂന്നതെന്നും ചോദിച്ചു. ആർക്കു വേണ്ടി കൊണ്ടുവന്ന പണമാണിത്. അവിടത്തെ കോളനികളിൽ ഇടതുമുന്നണി തന്നെയാണ് പണം കൊടുക്കുന്നത്. ആ നിലയിലേക്ക് അവരെത്തിയെന്നും അൻവർ പറഞ്ഞു.

ഉപതെരഞ്ഞെടുപ്പിൽ ഒരു സ്ഥാനാർത്ഥിക്ക് 40 ലക്ഷം രൂപയാണ് ചെലവഴിക്കാവുന്ന പരമാവധി തുക. എന്നാൽ മൂന്ന് മുന്നണികളും കൂടി 36 കോടി രൂപയാണ് ചേലക്കരയിൽ ചെലവഴിച്ചത്. ഈ മണ്ഡലത്തിൽ ആരും ജയിക്കില്ല. തങ്ങൾ കോടതിയിൽ പോകും. ബൂത്ത് തിരിച്ച് ഓരോ പാർട്ടിയും ചെലവാക്കിയ തുകയുടെ കണക്ക് തന്റെ കൈയ്യിലുണ്ടെന്നും അൻവർ പറ‌ഞ്ഞു.

താൻ തെരഞ്ഞെടുപ്പ് ചട്ടം ലംഘിക്കുന്നില്ലെന്ന് വ്യക്തമാക്കിയാണ് അൻവർ വാർത്താസമ്മേളനവുമായി മുന്നോട്ട് വന്നത്. മുഖ്യമന്ത്രി പിണറായി വിജയന് വേണ്ടിയാണ് പോലീസ് തന്റെ വാർത്താ സമ്മേളനം തടയുന്നതെന്നും അദ്ദേഹം പറഞ്ഞു. വാർത്താ സമ്മേളനം തുടരുന്നതിനിടെ പി.വി.അൻവറിനോട് ഇത് നിർത്താൻ തെരഞ്ഞെടുപ്പ് ഉദ്യോഗസ്ഥർ പറഞ്ഞു. എന്നാൽ ഉദ്യോഗസ്ഥരോട് അൻവർ തർക്കിച്ചു. തുടർന്ന് അൻവറിന് നോട്ടീസ് നൽകിയ ശേഷം ഉദ്യോഗസ്ഥർ മടങ്ങി.

എന്തിനാണ് പിണറായി ഭയക്കുന്നതെന്ന് അൻവർ വാർത്താസമ്മേളനത്തിൽ ചോദിച്ചു. ഇന്ന് പ്രചരണം നടത്തരുതെന്ന് ചട്ടം പറയുന്നില്ല. കോൺഗ്രസിൽ നിന്ന് വന്ന ഏതോ ഒരു അലവലാതിയുമായി എന്തിനാണ് ഏറ്റുമുട്ടാൻ നിൽക്കുന്നതെന്നും അൻവർ ചോദിച്ചു.