മുനമ്പം: വഖഫ് ഭീകരതയ്ക്ക് ഇരയായി കിടപ്പാടം പോലും അന്യമാകുന്ന, നിസ്സഹായരായ മുനമ്പം ജനതയ്ക്കു വേണ്ടി, ഇടത്-വലതു മുന്നണികള്ക്ക് ശക്തമായ താക്കീതു നല്കി സിറോ മലബാര് സഭ മേജര് ആര്ച്ച് ബിഷപ് മാര് റാഫേല് തട്ടില്. മുനമ്പം ജനതയോടു സംസാരിക്കുമ്പോഴും വാര്ത്താ സമ്മേളനത്തിലുമാണ് അദ്ദേഹം സഭയുടെ നിലപാടുകള് തുറന്നടിച്ചത്. മുമ്പു വോട്ട് ചെയ്തിരുന്നവര്ക്ക് ഇനിയും വോട്ട് ചെയ്യണമെന്ന് നിര്ബന്ധം പിടിക്കരുതെന്ന് അദ്ദേഹം പറഞ്ഞു.
നൂറ്റാണ്ടുകളായി താമസിക്കുന്ന സ്ഥലങ്ങളില് നിന്ന് ജാതിമത ഭേദമെന്യേ മുനമ്പം നിവാസികള് കുടിയൊഴിയേണ്ട സാഹചര്യം, ഒട്ടും സുതാര്യമല്ലാത്ത നിയമം മൂലമുണ്ടായിരിക്കുന്നു. ഇതു ജനാധിപത്യത്തിനു കളങ്കമാണ്, മനുഷ്യത്വരഹിതമാണ്.
നമ്മുടെ സമരം രാഷ്ട്രീയ നേതാക്കള്ക്കു പ്രശ്നമാകുന്നത് അടുത്ത തെരഞ്ഞെടുപ്പിലാണ്. ഓര്ക്കേണ്ട കാര്യങ്ങള് ഓര്ത്ത് കണക്കു ചോദിക്കാന് തക്ക ബുദ്ധിയും വിവേകവുമുള്ള ജനതയാണ് നമ്മള്. തെരഞ്ഞെടുപ്പില് വോട്ട് ചെയ്യാന് ബൂത്തിലെത്തുമ്പോള്, എന്നും ചെയ്തു പരിചിതമായ അതേ ചിഹ്നങ്ങളില്ത്തന്നെ, അതേ കക്ഷികള്ക്കുതന്നെ വോട്ട് ചെയ്യണമെന്ന് ആരും നിര്ബന്ധം പിടിക്കരുത്. വോട്ടുകള് മാറ്റിച്ചെയ്യാനും അറിയാമെന്ന് നാം കാണിച്ചുകൊടുക്കണം, തെളിയിക്കണം. സമരക്കാര്ക്ക് ഐക്യദാര്ഢ്യം പ്രഖ്യാപിച്ച് അദ്ദേഹം തുടര്ന്നു.
ളോഹയിട്ടവര് മുനമ്പത്തു വന്ന് വര്ഗീയത പറയുകയാണെന്ന് ആരോപിച്ച സിപിഎം നേതാവും സംസ്ഥാന വഖഫ് മന്ത്രിയുമായ വി. അബ്ദുറഹ്മാന് അദ്ദേഹം വാര്ത്താ സമ്മേളനത്തില് ചുട്ട മറുപടി കൊടുത്തു. മന്ത്രി പറഞ്ഞതിന്റെ പേരില് എന്റെ വസ്ത്രം ഊരിമാറ്റുമെന്ന് നിങ്ങള് കരുതുന്നുണ്ടോ? ഞാന് പറയുന്ന ആശയങ്ങള് മാറ്റുമെന്ന് നിങ്ങള് വിചാരിക്കുന്നുണ്ടോ? ഞങ്ങള് ഇവരെ സംബന്ധിച്ച് (മുനമ്പത്തുകാര്) ഇടയന്മാരാണ്. ഞങ്ങള് നേതൃത്വം നല്കുന്ന ഈ ജനങ്ങളുടെ കഷ്ടപ്പാടുകള് പരിഹരിക്കാന് ഞങ്ങള് അവരുടെ കൂടെ നില്ക്കുന്നില്ലെങ്കില് ഒറ്റുകാരാകും. ഞങ്ങള്ക്ക് ഉത്തരവാദിത്തത്തില് നിന്ന് ഒഴിഞ്ഞുമാറാനാകില്ല. ളോഹ മാറ്റി ഖദര് ഷര്ട്ടിട്ടോ ചുവന്ന ഷര്ട്ടിട്ടോ വന്നു നില്ക്കാനൊന്നും പറ്റില്ല. അതല്ലല്ലോ അതിന്റെ മാര്ഗം, മാര് തട്ടില് കൂട്ടിച്ചേര്ത്തു.
