റാഞ്ചി: ബിജെപി ജാര്ഖണ്ഡില് മുന്നേറും, ഗോത്രവര്ഗ്ഗത്തിന് ബിജെപിയോട് അകല്ച്ചയില്ല, എല്ലാവര്ക്കും വേണ്ടത് ബിജെപിയുടെ വികസന അജണ്ട: എംപി ഫംഗ്നോന് കോന്യാക്
ബിജെപിയ്ക്ക് ജാര്ഖണ്ഡില് നല്ല വിജയസാധ്യതയുണ്ടെന്ന് ബിജെപിയുടെ രാജ്യസഭാ എംപിയായ ഫംഗ്നോന് കോന്യാക്. ഗോത്രവര്ഗ്ഗങ്ങള്ക്ക് ഇപ്പോള് ബിജെപിയോട് തീരെ അകല്ച്ചയില്ലെന്നും അവര് പറഞ്ഞു.
നിയമസഭാ തെരഞ്ഞെടുപ്പ് പ്രചാരണത്തിനായി ജാര്ഖണ്ഡില് എത്തിയതായിരുന്നു അവര്. “വികസന അജണ്ടയെ ഇഷ്ടപ്പെടുന്നതുകൊണ്ടാണ് ജാര്ഖണ്ഡില് ബിജെപിയ്ക്ക് നല്ല സാധ്യതയുണ്ടെന്ന് പറയുന്നത്. അന്തരീക്ഷം വളരെ നല്ലതാണ്. ഞാനും ഒരു ഗോത്രവര്ഗ്ഗക്കാരിയാണ്”. – അവര് പറഞ്ഞു.
“ഞാന് ബിജെപിയാണ്. ഞാന് ഗോത്രവര്ഗ്ഗക്കാരിയുമാണ് എന്നത് തന്നെയാണ് ബിജെപി ഗോത്രവര്ഗ്ഗക്കാര്ക്കെതിരല്ലെന്നതിന് ഏറ്റവും വലിയ തെളിവ്. ഇക്കുറി ബിജെപി ജാര്ഖണ്ഡില് വിജയിക്കും. കാരണം മുന്നേറണമെങ്കില് ജാര്ഖണ്ഡിന് ബിജെപിയെ ജയിപ്പിച്ചേ മതിയാവൂ.”- അവര് സൂചിപ്പിച്ചു.
ജാര്ഖണ്ഡില് ബിജെപി സ്ഥാനാര്ത്ഥിയായി മത്സരിക്കാന് ശക്തരായ സ്ഥാനാര്ത്ഥികള് ഉണ്ട്. ഇപ്പോള് ജാര്ഖണ്ഡ് ഭരിയ്ക്കുന്ന ഹേമന്ത് സോറന്റെ വലംകൈയായിരുന്ന ചമ്പയ് സോറന്, ഹേമന്ത് സോറന്റെ അന്തരിച്ച ജ്യേഷ്ഠന് ദുര്ഗ സോറന്റെ ഭാര്യ സീത സോറന്, മുന് ജാര്ഖണ്ഡ് മുഖ്യമന്ത്രി ബാബുലാല് മറാണ്ടി എന്നിവര് ബിജെപി സ്ഥാനാര്ത്ഥിപട്ടികയില് ഉണ്ട്.
ഇപ്പോള് ജാര്ഖണ്ഡ് ഭരിച്ചിരുന്ന ജാര്ഖണ്ഡ് മുക്തി മോര്ച്ചയില് നിന്നും ബിജെപിയില് എത്തിയവരാണ് ചമ്പയ് സോറനും സീത സോറനും. ജാര്ഖണ്ഡ് മുക്തി മോര്ച്ച നേതാവും ജാര്ഖണ്ഡ് മുഖ്യമന്ത്രിയുമായ ഹേമന്ത് സോറന്റെ വലംകൈയായിരുന്നു ചമ്പയ് സോറന്. ഹേമന്ത് സോറന് ജയിലില് കഴിഞ്ഞിരുന്നപ്പോള് 153 ദിവസം ജാര്ഖണ്ഡ് മുഖ്യമന്ത്രിയായത് ചമ്പയ് സോറനാണ്. പിന്നീട് ഹേമന്ത് സോറന് ജയിലില് നിന്നും പുറത്തിറങ്ങിയപ്പോള് അപമാനിതനായി ഇറങ്ങിപ്പോകേണ്ടിവന്നു എന്നതാണ് ചമ്പയ് സോറന്റെ ദുഖം. പിന്നീട് അദ്ദേഹം 2024 ആഗസ്തില് ബിജെപിയിലേക്ക് മാറി.
മുഖ്യമന്ത്രി ഹേമന്ത് സോറന് രണ്ട് സഹോദരന്മാരും ഒരു സഹോദരിയുമാണ് ഉള്ളത്. ഇതില് മൂത്ത സഹോദരനാണ് ദുര്ഗ സോറന്. 2009ല് ദുര്ഗ സോറന് മരണപ്പെട്ടിരുന്നു. ഇദ്ദേഹത്തിന്റെ ഭാര്യയാണ് സീത സോറന്. മൂന്ന് തവണ എംഎല്എ ആയിരുന്നു. പാര്ട്ടി വിരുദ്ധപ്രവര്ത്തനം നടത്തി എന്ന കുറ്റം ആരോപിച്ചാണ് സീതാ സോറനെ പുറത്താക്കിയത്. ഇതോടെ ഹേമന്ത് സോറന്റെ കുടുംബത്തിനുള്ളില് തന്നെ വലിയ വിള്ളലാണ് ഉണ്ടായത്.
81 അംഗ ജാര്ഖണ്ഡ് നിയമസഭയിലേക്ക് നവമ്പര് 13നും 20നും ആയി രണ്ടുഘട്ടങ്ങളിലാണ് തെരഞ്ഞെടുപ്പ് നടക്കുക. നവമ്പര് 23നാണ് വോട്ടെണ്ണല്. ഓള് ജാര്ഖണ്ഡ് സ്റ്റുഡന്സ് യൂണിയന് (എജെഎസ് യു), ജെഡി(യു), ലോക ജനശക്തി പാര്ട്ടി എന്നിവയുമായി സഖ്യത്തോടെയാണ് ബിജെപി ജാര്ഖണ്ഡില് മത്സരിക്കുന്നത്. 2019ല് ജാര്ഖണ്ഡ് മുക്തിമോര്ച്ചയും കോണ്ഗ്രസും ഉള്പ്പെടെയുള്ള സഖ്യമുന്നണി 81ല് 47 സീറ്റുകള് നേടി. 30 സീറ്റുകള് ജാര്ഖണ്ഡ് മുക്തിമോര്ച്ച നേടിയപ്പോള് 17 സീറ്റുകള് കോണ്ഗ്രസും നേടി. ബിജെപി 25 സീറ്റുകളില് വിജയിച്ചു.
