വഖഫ് ഭേദഗതി ബില്ലിന് പിന്തുണയുമായി മുസ്ലിം വനിതാ സംഘം മുന്നോട്ടുവന്നത് ചരിത്രസംഭവമാണ്. വഖഫ് ഭേദഗതി ബില്ലിനെ എതിര്ക്കാന് മുസ്ലീം സമൂഹം രണ്ടും കല്പിച്ചിറങ്ങിയ സാഹചര്യത്തിലാണിതെന്നോര്ക്കണം. സാമൂഹിക ക്ഷേമത്തില് നിലവിലുള്ള വഖഫ് നിയമങ്ങള് പര്യാപ്തമല്ലെന്ന് ചൂണ്ടിക്കാട്ടി മുസ്ലിം വനിതാ സംഘം രംഗത്തിറങ്ങിയത് എന്തുകൊണ്ടും സന്തോഷം നല്കുന്നതാണ്. 2024ലെ വഖഫ് (ഭേദഗതി) ബില്ലില് രൂപീകരിച്ച സംയുക്ത പാര്ലമെന്ററി സമിതിയുടെ യോഗത്തിലാണ് നിയമം പരിഷ്കരിക്കേണ്ടതിന്റെ ആവശ്യകത മുസ്ലീം വനിതാ സംഘം ചൂണ്ടിക്കാട്ടിയത്. പാര്ലമെന്റ് അനക്സിലാണ് ചെയര്മാന് ജഗദംബികാ പാലിന്റെ നേതൃത്വത്തില് ജെപിസി യോഗം ചേര്ന്നത്. ഇതാദ്യമായാണ് സംയുക്ത പാര്ലമെന്ററി സമിതി വനിതാ കൂട്ടായ്മയെ വിളിച്ചതും മുസ്ലീം സംഘം സന്നിഹിതരായതും. യോഗത്തില് മുസ്ലീം സ്ത്രീകള് എടുത്ത നിലപാട് ശ്രദ്ധേയമാണ്.
വഖഫ് മാനേജ്മെന്റ് കാര്യക്ഷമമാക്കാന് ലക്ഷ്യമിട്ടുള്ള ഭേദഗതി, നിയമമാകേണ്ടത് അനിവാര്യമാണെന്നാണ് സംഘം അറിയിച്ചത്. സാമൂഹ്യ ക്ഷേമത്തില് വഖഫ് ബോര്ഡിന് പങ്കില്ല. വഖഫ് കാര്യങ്ങളില് സ്ത്രീകള്ക്കും സമൂഹത്തിലെ പിന്നാക്ക വിഭാഗങ്ങള്ക്കും പ്രാതിനിധ്യമോ വിഹിതമോ നല്കുന്നതിനെ അനുകൂലിക്കാത്തവരാണ് ബോര്ഡിനെ നിയന്ത്രിക്കുന്നത്. അതുകൊണ്ടുതന്നെ നിലവില് വഖഫ് ബോര്ഡിന്റെ സാമൂഹ്യക്ഷേമ പ്രവര്ത്തനങ്ങള് വ്യക്തമാക്കണമെന്ന് അവര് ആവശ്യപ്പെട്ടു. അനാഥര്, വിധവകള്, വിവാഹമോചിതരായ സ്ത്രീകള്, പുനര്വിവാഹം ആഗ്രഹിക്കുന്ന വിധവകള് എന്നിവര്ക്ക് നല്കുന്ന സഹായത്തെക്കുറിച്ച് വഖഫ് ബോര്ഡിനോട് വിശദീകരണം തേടിയിട്ടുണ്ടെന്ന് അദ്ധ്യക്ഷത വഹിച്ച ജഗദംബിക പാല് അറിയിച്ചു.
മുസ്ലിം വനിതാ കൂട്ടായ്മയ്ക്ക് പുറമെ മറ്റ് സംഘടനകളും ജെപിസിക്ക് മുമ്പാകെ നിര്ദ്ദേശങ്ങള് അവതരിപ്പിച്ചു. ഖാരി അബ്റാര് ജമാലിന്റെ നേതൃത്വത്തില് ജംഇയ്യത്ത് ഹിമായത്തുല് ഇസ്ലാമും കമ്മിറ്റിക്ക് മുന്നില് ഹാജരായി. സാമൂഹ്യക്ഷേമത്തില് വഖഫ് ബോര്ഡിന്റെ പങ്ക്, ഉദ്യോഗസ്ഥര്ക്കിടയിലെ അഴിമതി എന്നിവ ജമാല് ഉന്നയിച്ചു. മസ്ജിദുകളും ദര്ഗകളും ശ്മശാനങ്ങളും ഒഴികെയുള്ള വഖഫ് ഭൂമിയില് തൊഴിലധിഷ്ഠിത പദ്ധതികള് ആരംഭിക്കണം. വഖഫ് ബോര്ഡിലെ മാഫിയ ഭരണം അവസാനിപ്പിക്കേണ്ട സമയമായെന്നും വഖഫ് സ്വത്തുക്കള് കമ്പോള നിരക്കില് പാട്ടത്തിനോ വാടകയ്ക്കോ നല്കണമെന്നും നിര്ദ്ദേശമുയര്ന്നു.
ഫായിസ് അഹമ്മദ് ഫായിസിന്റെ നേതൃത്വത്തില് വേള്ഡ് പീസ് കൗണ്സില് എന്ന സംഘടനയും സമിതിക്ക് മുമ്പാകെ നിര്ദ്ദേശങ്ങള് സമര്പ്പിച്ചു. നിലവിലെ നിയമത്തില് വനിതാ അംഗങ്ങളെ ബോര്ഡില് ഉള്പ്പെടുത്തുന്നതിന് നിയന്ത്രണമില്ലെന്ന് ഫായിസ് പറഞ്ഞു. പിന്നെ എന്തിനാണ് നിര്ദിഷ്ട ബില്ലിലെ വനിതാ അംഗങ്ങള്ക്കുള്ള വ്യവസ്ഥയെ പ്രതിപക്ഷ അംഗങ്ങളും ചില സംഘടനകളും എതിര്ക്കുന്നത്. നൂറുകണക്കിന് അമുസ്ലിം കെയര്ടേക്കര്മാര് ഇതിനകം തന്നെ വഖഫ് ബോര്ഡിന്റെ ഭാഗമാണെന്നും അനാവശ്യമായാണ് ഭേദഗതി ബില്ലിനെ എതിര്ക്കുന്നതെന്നും ഫായിസ് ചൂണ്ടിക്കാട്ടുന്നു. അതുപോലെ ഭൂമി സ്വന്തമാക്കാന് വഖഫ് ബോര്ഡ് നടത്തുന്ന ശ്രമങ്ങളും ചോദ്യം ചെയ്യപ്പെട്ടു. കേരളത്തില് മുനമ്പം ഭൂമി നഷ്ടപ്പെടാതിരിക്കാന് അറുന്നൂറിലേറെ കുടുംബങ്ങള് കടുത്ത സമരത്തിലാണ്. സമരം ഇതിനകം ദിവസങ്ങള് പിന്നിട്ടു. സമരം ശക്തമാക്കാന് സംഘാടക സമിതി തീരുമാനിച്ചിട്ടുണ്ട്. കണ്ണാടകത്തിലും നിരവധി മേഖലകളില് ഭൂമി പ്രശ്നം വലിയൊരു കീറാമുട്ടിയായി കിടക്കുകയാണ്. വഖഫ് ഭേദഗതി ബില്ല് വന്നപ്പോഴാണ് ഇത്തരം പ്രശ്നങ്ങള് പൊങ്ങിവന്നിരിക്കുന്നത്. കേരളത്തിലെ വഖഫ് അധികാരികള്ക്ക് അയവുള്ള സമീപനം വന്ന സാഹചര്യത്തില് ദേശീയതലത്തില് മുസ്ലീം സ്ത്രീകള് ശക്തമായി നിലപാടുമായി രംഗത്തിറങ്ങുന്നത് എന്തുകൊണ്ടും നല്ലകാര്യമാണ്.
