ജന്മഭൂമി സുവര്‍ണ ജൂബിലിയാഘോഷം: സെമിനാറുകള്‍, നൃത്തങ്ങള്‍, സംഗീത സന്ധ്യ, മ്യൂസിക്കല്‍ മെഗാ ഷോ, കായിക താരങ്ങള്‍ക്ക് ആദരം

കോഴിക്കോട്: ജന്മഭൂമി സുവര്‍ണ ജൂബിലി ആഘോഷമായ ‘സ്വ’ വിജ്ഞാനോത്സവത്തിന്റെ ഭാഗമായ ബ്ലൂ റവല്യൂഷന്‍ സെമിനാര്‍ നാളെ രാവിലെ 10.30ന് കേന്ദ്രമന്ത്രി ജോര്‍ജ് കുര്യന്‍ ഉദ്ഘാടനം ചെയ്യും. ഭാരതീയ മത്സ്യപ്രവര്‍ത്തക സംഘം സംസ്ഥാന ജനറല്‍ സെക്രട്ടറി പി.പി. ഉദയഘോഷ് അധ്യക്ഷനാകും. ബിജെപി സംസ്ഥാന ജനറല്‍ സെക്രട്ടറി എം.ടി. രമേശ് സംസാരിക്കും. സെമിനാറില്‍ ഭാരതീയ മത്സ്യപ്രവര്‍ത്തക സംഘം സംസ്ഥാന അധ്യക്ഷന്‍ പി. പീതാംബരന്‍ വിഷയം അവതരിപ്പിക്കും. എന്‍.പി. രാധാകൃഷ്ണന്‍ മോഡറേറ്ററാകും. ഡോ. എസ്. സുരേഷ് കുമാര്‍, ഡോ. ആശാലത, സംഗീത എന്‍.ആര്‍. തുടങ്ങിയവര്‍ സംസാരിക്കും.

നാലിന് രാവിലെ 10.30ന് വനിതാ സെമിനാര്‍ ദേശീയ മനുഷ്യാവകാശ കമ്മിഷന്‍ അധ്യക്ഷ വിജയഭാരതി സയാനി ഉദ്ഘാടനം ചെയ്യും. മുന്‍ പ്രിന്‍സിപ്പല്‍ ചീഫ് പോസ്റ്റ് മാസ്റ്റര്‍ ജനറല്‍ ഇന്ദിരാ കൃഷ്ണകുമാര്‍ അധ്യക്ഷയാകും. പ്രൊഫ. താജി ജി.ബി., ഡോ. ജെ. പ്രമീളാദേവി എന്നിവര്‍ സംസാരിക്കും.

വൈകിട്ട് മൂന്നിന് സാഹിത്യ സെമിനാര്‍ ന്യൂദല്‍ഹി ഇന്ദിരാഗാന്ധി നാഷണല്‍ സെന്റര്‍ ഫോര്‍ ആര്‍ട്‌സിലെ ഡോ. സച്ചിദാനന്ദ ജോഷി ഉദ്ഘാടനം ചെയ്യും. ആഷാ മേനോന്‍, ഡോ. പി. ശിവപ്രസാദ്, ഡോ. ശ്രീശൈലം ഉണ്ണികൃഷ്ണന്‍, ഡോ. എന്‍.ആര്‍. മധു തുടങ്ങിയവര്‍ പ്രഭാഷണം നടത്തും. വൈകിട്ട് നാലിന് ദേവദാസ് കെ. ഒറ്റപ്പാലത്തിന്റെ പൂതംതിറയും 4.30ന് ദീപ്ത പി.യുടെ ഭരതനാട്യം, അഞ്ചിന് അഞ്ജു ശിവാനന്ദിന്റെ കുച്ചുപ്പുടി, 5.30 ന് പ്രസന്ന പ്രകാശിന്റെ മോഹിനിയാട്ടം, വൈകിട്ട് ആറിന് മാതാ പേരാമ്പ്ര ചിലപ്പതികാരത്തിന്റെ നൃത്ത സംഗീതാവിഷ്‌കാരവും വേദിയില്‍ അവതരിപ്പിക്കും.

നാലിന് മീറ്റ് ദ് ഗവര്‍ണര്‍ പരിപാടിയില്‍ കാലത്ത് 10.30ന് ഗോവ ഗവര്‍ണര്‍ പി.എസ്. ശ്രീധരന്‍ പിള്ള തെരഞ്ഞെടുക്കപ്പെട്ട സദസിനോട് സംവദിക്കും. പ്രൊഫ. കെ.വി. തോമസ് അധ്യക്ഷനാകും. അഞ്ചിന് രാവിലെ 10.30ന് നടക്കുന്ന മാധ്യമ സെമിനാര്‍ എസ്. ഗുരുമൂര്‍ത്തി ഉദ്ഘാടനം ചെയ്യും. മുന്‍ കേന്ദ്രമന്ത്രി രാജീവ് ചന്ദ്രശേഖര്‍, എം.ജി. രാധാകൃഷ്ണന്‍, കെ.വി.എസ്. ഹരിദാസ്, എ.കെ. അനുരാജ് എന്നിവര്‍ സംസാരിക്കും. വൈകിട്ട് 4.30ന് മുരുകന്‍ അട്ടപ്പാടിയുടെ നാടന്‍പാട്ടും, 5.45ന് ദേവ്‌ന സുരേന്ദ്രന്റെ ഭരതനാട്യം, ആറിന് ഹിന്ദുസ്ഥാന്‍ കളരി സംഘത്തിന്റെ കളരിപ്പയറ്റ് എന്നിവയ്‌ക്ക് പുറമെ 6.30ന് ദര്‍ശനം പരിപാടിയില്‍ കൊളത്തൂര്‍ അദൈ്വതാശ്രമം മഠാധിപതി സ്വാമി ചിദാനന്ദപുരിയുടെ പ്രഭാഷണവും ഉണ്ടായിരിക്കും. 7ന് പ്രശസ്ത കര്‍ണാടക സംഗീതജ്ഞ സൂര്യഗായത്രിയുടെ സംഗീത സന്ധ്യയും വേദിയില്‍ അരങ്ങേറും.

ആറിന് രാവിലെ 10.30ന് പ്രതിഭാ സംവാദത്തില്‍ എന്‍ഐടി കാലിക്കറ്റ് ഡയറക്ടര്‍ ഡോ. പ്രസാദ് കൃഷ്ണ തെരഞ്ഞെടുക്കപ്പെട്ട വിദ്യാര്‍ത്ഥികളോട് സംവദിക്കും. വൈകിട്ട് 4.15ന് രൂപേഷ് ആര്‍. മാരാരുടെ സോപാന സംഗീതം, 4.30ന് കലാമണ്ഡലം പ്രിയ ടി.കെ ആന്‍ഡ് ടീം അവതരിപ്പിക്കുന്ന ‘മലയാളപ്പുഴ’ നൃത്താവിഷ്‌കാരം, അഞ്ചിന് ടി.പി. കുഞ്ഞിരാമന്‍ അവതരിപ്പിക്കുന്ന പാവക്കൂത്ത്, 5.30ന് രാഗേഷ് പരമേശ്വറും നന്ദന വിനോദും അവതരിപ്പിക്കുന്ന ക്ലാസിക്കല്‍ നൃത്തം, 6.30ന് തപസ്യ കലാസാഹിത്യവേദി അവതരിപ്പിക്കുന്ന ആരണ്യപര്‍വം നാടകവും നടക്കും.