ന്യൂദല്ഹി: ഭാരതത്തിന്റെ ആദ്യത്തെ അനലോഗ് ബഹിരാകാശ ദൗത്യത്തിന് തുടക്കം കുറിച്ച് ഐഎസ്ആര്ഒ. ലഡാക്കിലെ ലേയിലാണ് പുതിയ ദൗത്യം ആരംഭിച്ചിരിക്കുന്നത്. ഭൂമിക്ക് പുറത്തുള്ള ജീവന്റെ തുടിപ്പ് കണ്ടെത്തുകയാണ് ദൗത്യത്തിന്റെ ലക്ഷ്യം.
ചൊവ്വയിലെയും ചന്ദ്രനിലെയും മറ്റ് ഗ്രഹങ്ങളിലെയും മനുഷ്യവാസ സാദ്ധ്യതകളും പഠനത്തിന്റെ ഭാഗമാകും. പുത്തന് കണ്ടുപിടുത്തങ്ങള്ക്കും ഭൂമിക്ക് പുറത്തുള്ള സാഹചര്യങ്ങള് വിലയിരുത്തുന്നതിനും ദൗത്യം സഹായകരമാകുമെന്ന് ഐഎസ്ആര്ഒ എക്സില് കുറിച്ചു. ഹാബ് 1 എന്ന് പേരിട്ടിരിക്കുന്ന ചെറിയ പേടകത്തിലാണ് പഠനങ്ങള് നടക്കുന്നത്.
മനുഷ്യരെ ബഹിരാകാശത്ത് എത്തിക്കുന്ന ഗഗന്യാന് ദൗത്യത്തിനും ഭാവിയില് മറ്റ് ബഹിരാകാശ പര്യവേഷണങ്ങള്ക്കും അനലോഗ് ബഹിരാകാശ ദൗത്യം കൂടുതല് സംഭാവനകള് നല്കും. മനുഷ്യരെ ബഹികാരാശത്ത് എത്തിക്കുന്നതിനും മറ്റു ഗ്രഹങ്ങളിലെ വാസയോഗ്യത അളക്കുന്നതിനും പുതിയ ദൗത്യം സഹായിക്കുമെന്നും ഐഎസ്ആര്ഒ വ്യക്തമാക്കി.
ഭൂപ്രകൃതി കണക്കിലെടുത്താണ് ഗവേഷകര് ലഡാക്കിലെ ലേ ദൗത്യത്തിനായി തിരഞ്ഞെടുത്തത്. ചന്ദ്രന്റെയും ചൊവ്വയുടെയും ഉപരിതലവുമായി ഏറെ അടുത്ത് കിടക്കുന്ന, ഭാരതത്തിലെ പ്രദേശമാണ് ലേ. ഇത് പഠനങ്ങള് എളുപ്പത്തിലാക്കാന് സഹായിക്കുന്നു. ബഹിരാകാശത്തെ കുറിച്ച് ദീര്ഘനാള് നീണ്ടുനില്ക്കുന്ന പഠനങ്ങള് നടത്താനും യോജിച്ച പ്രദേശമാണ് ലേയെന്നും ഗവേഷക സംഘം ചൂണ്ടിക്കാട്ടി.
ഐഎസ്ആര്ഒയുടെ ഹ്യുമന് സ്പേസ്ഫ്ളൈറ്റ് സെന്ററിന്റെ നേതൃത്വത്തില് ലഡാക്ക് ഓട്ടോണമസ് ഹില് ഡെവലമെന്റ് കൗണ്സില്, യൂണിവേഴ്സിറ്റി ഓഫ് ലഡാക്ക്, ഐഐടി ബോംബെ എന്നിവയുടെ സഹകരണത്തോടെയാണ് ദൗത്യം നടപ്പാക്കുന്നത്.
