പട്‌ന : അടുത്ത വർഷം നടക്കാനിരിക്കുന്ന നിയമസഭാ തെരഞ്ഞെടുപ്പിന് മുന്നോടിയായി സഖ്യകക്ഷികൾക്കിടയിൽ മികച്ച ഏകോപനം ഉറപ്പാക്കാൻ ബിഹാർ മുഖ്യമന്ത്രി നിതീഷ് കുമാർ തിങ്കളാഴ്ച സംസ്ഥാനത്ത് ഭരണകക്ഷിയായ എൻഡിഎയുടെ യോഗം വിളിച്ചു. ജെഡിയു, ബിജെപി, ലോക് ജനശക്തി പാർട്ടി (രാം വിലാസ്), രാഷ്‌ട്രീയ ലോക് മോർച്ച, ഹിന്ദുസ്ഥാനി അവാം മോർച്ച എന്നിവയുടെ നേതാക്കളാണ് മുഖ്യമന്ത്രിയുടെ ഒന്നാം നമ്പർ ആൻ മാർഗിലെ വസതിയിൽ യോഗത്തിനായി ഒത്തുകൂടിയത്.
അതേ സമയം 243 അംഗ സഭയിൽ 200ലധികം സീറ്റുകൾ എൻഡിഎ നേടുമെന്ന് തങ്ങളുടെ പാർട്ടി നേതാവ് ഉറപ്പിച്ചുപറയുന്നതായി സംസ്ഥാന മന്ത്രിയും ജെഡിയു ദേശീയ ജനറൽ സെക്രട്ടറിയുമായ അശോക് ചൗധരി പറഞ്ഞു. അതിന് ഘടകകക്ഷികൾക്കിടയിൽ തികഞ്ഞ സമന്വയം അനിവാര്യമാണ്. അതിനായാണ് ഇന്നത്തെ യോഗം വിളിച്ചിരിക്കുന്നതെന്നും അദ്ദേഹം വ്യക്തമാക്കി.
കൂടാതെ മികച്ച ഏകോപനമാണ് ഈ വർഷത്തെ ലോക്‌സഭാ തെരഞ്ഞെടുപ്പിൽ തങ്ങൾ കണ്ടത്. അത് മുന്നോട്ട് കൊണ്ടുപോകുന്നത് നിയമസഭാ തെരഞ്ഞെടുപ്പിൽ മൂന്നിൽ രണ്ട് ഭൂരിപക്ഷം ഉറപ്പാക്കാൻ തങ്ങളെ സഹായിക്കുമെന്ന് ബിജെപി സംസ്ഥാന അധ്യക്ഷൻ ദിലീപ് ജയ്‌സ്വാൾ പറഞ്ഞു.
തെരഞ്ഞെടുപ്പിന് മാസങ്ങൾ ബാക്കിനിൽക്കെ വിളിച്ചു ചേർത്ത യോഗം കേഡർമാർക്ക് നല്ല സന്ദേശം നൽകുമെന്ന് ലോക് ജനശക്തി പാർട്ടി സംസ്ഥാന പ്രസിഡൻ്റ് രാജു തിവാരി പറഞ്ഞു.
രാഷ്‌ട്രീയ ലോക് മോർച്ചയുടെ തലവനായ മുൻ രാജ്യസഭാ എംപി ഉപേന്ദ്ര കുശ്‌വാഹയും അദ്ദേഹത്തിന്റെ പിതാവും കേന്ദ്രമന്ത്രിയുമായ ജിതൻ റാം മാഞ്ചി സ്ഥാപിച്ച ഹിന്ദുസ്ഥാനി അവാം മോർച്ചയുടെ ദേശീയ അധ്യക്ഷനും സംസ്ഥാന മന്ത്രി സന്തോഷ് സുമനും ഏകോപന യോഗത്തെ പ്രകീർത്തിച്ചു.
പ്രതികരിക്കാൻ ഇവിടെ എഴുതുക: