കൊച്ചി: കളമശരി കണ്വെന്ഷന് സെന്റര് സഫോടനത്തിലെ പ്രതി ഡൊമിനിക്ക് മാര്ട്ടിനെതിരേ ചുമത്തിയിരുന്ന യുഎപിഎ കേസ് ഒഴിവാക്കി. സർക്കാർ അനുമതി നൽകാത്തതിനെ തുടർന്നാണ് നടപടി. രാഷ്ട്രീയ നിലപാടിന്റെ അടിസ്ഥാനത്തിലാണ് സര്ക്കാര് തീരുമാനമെന്നാണ് വിലയിരുത്തല്. കേസില് അന്വേഷണം പൂര്ത്തിയാക്കിയ പോലീസ് സംഘം, യുഎപിഎ വകുപ്പുകള് ഉള്പ്പെടുത്തിക്കൊണ്ടുള്ള റിപ്പോര്ട്ടാണ് നല്കിയത്.
എന്നാല് യുഎപിഎ കമ്മിറ്റി പ്രതിക്കെതിരേ യുഎപിഎ വകുപ്പ് ചുമത്താനുള്ള നീക്കം തള്ളുകയായിരുന്നു. കഴിഞ്ഞ ഒക്ടോബര് 29ന് കളമശേരി സാമ്ര കണ്വെന്ഷന് സെന്ററില് യഹോവ സാക്ഷികളുടെ പ്രാര്ഥനാ ചടങ്ങിനിടെയുണ്ടായ സ്ഫോടനത്തില് ഒരു കുടുംബത്തിലെ മൂന്നുപേരുള്പ്പെടെ എട്ടുപേരാണ് മരിച്ചത്. 52 പേര്ക്ക് പരിക്കേറ്റിരുന്നു.
കേസിലെ ഏകപ്രതി തമ്മനം ചിലവന്നൂര് വേലിക്കകത്ത് വീട്ടില് ഡൊമിനിക് മാര്ട്ടിനെതിരേ യുഎപിഎ, സ്ഫോടക വസ്തു നിരോധന നിയമം, വധശ്രമം, ഗൂഢാലോചന തുടങ്ങിയ വകുപ്പുകളാണ് ചുമത്തിയിരുന്നത്. ഈ വര്ഷം ഏപ്രിലില് എറണാകുളം ജില്ലാ പ്രിന്സിപ്പല് സെഷന്സ് കോടതിയില് പോലീസ് കുറ്റപത്രം സമര്പ്പിച്ചിരുന്നു. തുടര്ന്ന്, വിചാരണ നടപടികള്ക്കായി കേസ് കളമശേരി മജിസ്ട്രേറ്റ് കോടതിയിലേക്ക് മാറ്റിയിരിക്കുകയാണ്.
സാക്ഷികൾ തെറ്റായ ആശയങ്ങൾ പ്രചരിപ്പിക്കുന്നതിലും തന്റെ നിർദ്ദേശങ്ങൾ തള്ളിക്കളഞ്ഞതിലുമുള്ള പകയാണ് കൃത്യത്തിന് പ്രേരിപ്പിച്ചതെന്നാണ് പ്രതി നൽകിയിരുന്ന മൊഴി.
