ദില്ലി: വാട്സ്ആപ്പ് വീഡിയോ കോളിന് ക്ലാരിറ്റിയില്ലെന്ന് ഒരിക്കലെങ്കിലും പരാതി പറഞ്ഞിട്ടുള്ളവരാണല്ലേ നമ്മളെല്ലാവരും. കോള്‍ ചെയ്യുമ്പോള്‍ ക്യാമറ അങ്ങോട്ടുമിങ്ങോട്ടും മാറ്റി കഷ്ടപ്പെട്ടിട്ടുണ്ട് മിക്കപ്പോഴും. ഇപ്പോഴിതാ ഇതിനുള്ള പരിഹാരവുമായി എത്തിയിരിക്കുകയാണ് വാട്ട്‌സ്ആപ്പ്. വെളിച്ചക്കുറവുള്ള സ്ഥലങ്ങളില്‍ നിന്നും വിഡിയോ കോളുകള്‍ ചെയ്യാന്‍ ഉപയോക്താക്കളെ സഹായിക്കുന്നതിന് ലോ ലൈറ്റ് മോഡ് എന്ന പുതിയ ഫീച്ചര്‍ അവതരിപ്പിച്ചിരിക്കുകയാണ് വാട്ട്‌സ്ആപ്പ്. വാട്ട്‌സ്ആപ്പിലെ വീഡിയോകോളിനുണ്ടാകുന്ന പ്രശ്‌നത്തിന് ഇതോടെ പരിഹാരമാകും.
‘ലോ ലൈറ്റ് മോഡ്’ അവതരിപ്പിക്കുന്നതോടെ, കോളിലുള്ള ആളുടെ മുഖം മോശം ലൈറ്റിലും കൂടുതല്‍ വ്യക്തമാകാനും, ആശയവിനിമയം കൂടുതല്‍ ഫലപ്രദമായി നടത്താനും സാധിക്കുമെന്നാണ് റിപ്പോര്‍ട്ട്. ആപ്പില്‍ വീഡിയോ കോള്‍ ചെയ്യുമ്പോള്‍ ഇന്റര്‍ഫെയ്സിന്റെ വലതുവശത്ത് മുകളിലുള്ള ബള്‍ബ് ഐക്കണില്‍ ക്ലിക്ക് ചെയ്താല്‍ ഈ ഫീച്ചര്‍ പ്രയോജനപ്പെടുത്താം. വെളിച്ചമുള്ള സമയത്ത് ഈ ഫീച്ചര്‍ ടേണ്‍ ഓഫ് ചെയ്ത് വെയ്‌ക്കാനുള്ള സൗകര്യവുമുണ്ടാകും.
ആപ്പിന്റെ ഐഒഎസ്, ആന്‍ഡ്രോയിഡ് പതിപ്പുകളിലാണ് ലോ-ലൈറ്റ് മോഡ് ലഭ്യമാകുന്നത്. വീഡിയോ കോളില്‍ തന്നെ മികച്ച എക്‌സ്പീരിയന്‍സ് നല്‍കാനുള്ള ഫീച്ചറുകള്‍, ആപ്പ് നേരത്തെ അവതരിപ്പിച്ചിട്ടുണ്ട്. ടച്ച് അപ്പ് ഫീച്ചര്‍, ഫില്‍ട്ടറുകള്‍ ചേര്‍ക്കാനുള്ള ഓപ്ഷന്‍, ബാക്ക്ഗ്രൗണ്ട് മാറ്റാനുള്ള ഫീച്ചര്‍ തുടങ്ങിയവയാണ് ഇവ.വീഡിയോ കോളിനിടെ പശ്ചാത്തലം (ബാക്ക്ഗ്രൗണ്ട്) മാറ്റാനും ഫില്‍ട്ടറുകള്‍ ചേര്‍ക്കാനും പുതിയ ഫീച്ചറിലൂടെ കഴിയും.
പ്രതികരിക്കാൻ ഇവിടെ എഴുതുക: