പെരുമ്പാവൂർ : വീട്ടിൽ അതിക്രമിച്ചു കയറി കത്തികാണിച്ച് ഭീഷണിപ്പെടുത്തി രണ്ട് മൊബൈൽ ഫോണുകളും ഇരുചക്രവാഹനവും തട്ടിയെടുത്ത കേസിൽ ഒരാൾ കൂടി പിടിയിൽ. വളാഞ്ചേരി കരിപ്പോൾ കീരംകുന്നേൽ വീട്ടിൽ സുനിൽ (42)നെയാണ് പെരുമ്പാവൂർ പോലീസ് പിടികൂടിയത്.
സംഭവവുമായി ബന്ധപ്പെട്ട് പിറവം വട്ടപ്പാറ വീട്ടിൽ കുര്യാക്കോസ് (ബെന്നി ) ചാലക്കൽ കരിയാമ്പുറം മനാഫ്, കുട്ടമശേരി അമ്മാൻ കരത്തുണ്ടിൽ ഷിഫാസ് എന്നിവരെ നേരത്തെ അറസ്റ്റ് ചെയ്തിരുന്നു. വല്ലം സ്വദേശിയുടെ വീട്ടിൽ നിന്നാണ് വസ്തുക്കൾ കവർന്നത്. ഷിഫാസിന്റെ പക്കൽ നിന്നും വല്ലം സ്വദേശി പണം കടം വാങ്ങിയതായി പറയപ്പെടുന്നു.
ഇത് തിരിച്ചു കൊടുക്കാത്തതിന്റെ പേരിലായിരുന്നു ഫോണുകളും ഇരുചക്രവാഹനവും കവർന്നത്. കഴിഞ്ഞ വർഷം ആഗസ്റ്റിലായിരുന്നു സംഭവം. മലപ്പുറം കോട്ടപ്പുറത്ത് നിന്നാണ് പ്രതിയെ അറസ്റ്റ് ചെയ്തത്. മനാഫും, കുര്യാക്കോസും നിരവധി കേസുകളിലെ പ്രതികളാണ്.
അന്വേഷണ സംഘത്തിൽ എസ് ഐ മാരായ റിൻസ് എം. തോമസ്, പി. എം റാസിക്, എഎസ്ഐമാരായ പി.എ അബ്ദുൽ മനാഫ്, കെ. എസ്സുധീഷ്, സീനിയർ സിപിഒമാരായ എ ടി ജിൻസ്, മിഥുൻ മുരളി എന്നിവരാണുള്ളത്.
