മുംബൈ: വെടിയേറ്റ് മരിച്ച മുന്‍ മഹാരാഷ്‌ട്ര മന്ത്രി ബാബ സിദ്ദിഖിയുടെ ഘാതകര്‍ക്കെതിരെ മകന്‍ സീഷെന്‍ സിദ്ദിഖി. തന്റെ അച്ഛനെ കൊന്നവരെ നിയമത്തിനു കീഴില്‍ കൊണ്ടുവന്ന് അര്‍ഹിക്കുന്ന ശിക്ഷ നല്കണമെന്ന് സീഷന്‍ കഴിഞ്ഞ ദിവസം പ്രതികരിച്ചിരുന്നു. അതിനു പിന്നാലെയാണ് എക്‌സില്‍ കൊലപാതകികള്‍ക്കെതിരെ കുറിച്ചിരുക്കുന്നത്.
‘യുദ്ധം അവസാനിച്ചിട്ടില്ല. സിംഹത്തിന്റെ മകനാണ് അച്ഛന്‍. ആ രക്തം തന്നെയാണ് എന്റേയും സിരകളില്‍. അച്ഛനെ അവര്‍ നിശബ്ദരാക്കി, അദ്ദേഹം ഒരു സിംഹമായിരുന്നെന്ന് അവര്‍ മറന്നു. അദ്ദേഹത്തിന്റെ ഗര്‍ജ്ജനവും പോരാട്ടവുമാണ് എന്റെ സിരകളിലുമുള്ളത്. അദ്ദേഹം നീതിക്ക് വേണ്ടി നിലകൊണ്ടു. മാറ്റത്തിനായി പോരാടി, കൊടുങ്കാറ്റുകളെ അചഞ്ചലമായ ധൈര്യത്തോടെ നേരിട്ടു. അവരിപ്പോള്‍ ജയിച്ചെന്ന് കരുതിയാണ് ഇരിക്കുന്നത്. എന്നാല്‍ ഞാന്‍ ഇപ്പോഴും ഇവിടെയുണ്ട്, യുദ്ധം അവസാനിച്ചിട്ടില്ലെന്നും സീഷെന്‍ കുറിച്ചു.
സിദ്ദിഖിക്കൊപ്പം സീഷെനിനേയും കൊല്ലാന്‍ ബിഷ്‌ണോയി സംഘം പദ്ധതിയിട്ടിരുന്നതാണ്. എന്നാല്‍ അവസാന നിമിഷം സിദ്ദിഖിയെ മാത്രം വകവരുത്താന്‍ തീരുമാനിക്കുകയായിരുന്നു.
