തിരുവനന്തപുരം: സി.കെ. നായിഡു ട്രോഫിയില്‍ കേരളത്തിനെതിരെ ചണ്ഡീഗഢിന് 28 റണ്‍സിന്റെ ഒന്നാം ഇന്നിങ്‌സ് ലീഡ്. ചണ്ഡീഗഢിന്റെ ഒന്നാം ഇന്നിങ്‌സ് 412 റണ്‍സിന് അവസാനിച്ചു.
രണ്ടാം ഇന്നിങ്‌സ് ബാറ്റിങ് തുടങ്ങിയ കേരളം ഏഴ് വിക്കറ്റ് നഷ്ടത്തില്‍ 135 റണ്‍സെന്ന നിലയിലാണ്. കേരളത്തിന് ഇപ്പോള്‍ 107 റണ്‍സിന്റെ ലീഡാണുള്ളത്. നാല് വിക്കറ്റ് നഷ്ടത്തില്‍ 245 റണ്‍സെന്ന നിലയില്‍ മൂന്നാം ദിവസം കളി തുടങ്ങിയ ചണ്ഡീഗഢിന് തുടക്കത്തില്‍ തന്നെ 88 റണ്‍സെടുത്ത ദേവാങ് കൗശിക്കിന്റെ വിക്കറ്റ് നഷ്ടമായി. വൈകാതെ 68 റണ്‍സെടുത്ത നിഖിലിനെയും ഇവ്രാജ് റണ്ണൗട്ടയെയും പുറത്താക്കി കേരളം പിടിമുറുക്കിയെങ്കിലും ഏഴാമനായെത്തിയ അക്ഷിത് റാണ ചണ്ഡീഗഢിന്റെ രക്ഷകനായി. ഏകദിന ശൈലിയില്‍ ബാറ്റ് വീശിയ അക്ഷിത് ഒരു വശത്ത് ഉറച്ചു നിന്നതോടെ മത്സരത്തിലെ മുന്‍തൂക്കം കേരളത്തിന് നഷ്ടമാവുകയായിരുന്നു. അക്ഷിത് 99 പന്തില്‍ നിന്ന് 97 റണ്‍സെടുത്തു.
അഞ്ച് വിക്കറ്റ് വീഴ്‌ത്തിയ കിരണ്‍ സാഗറാണ് കേരള ബൗളിങ് നിരയില്‍ തിളങ്ങിയത്. ഏദന്‍ ആപ്പിള്‍ ടോം രണ്ട് വിക്കറ്റും ഷോണ്‍ റോജറും അനുരാജും ആസിഫ് അലിയും ഓരോ വിക്കറ്റ് വീതവും വീഴ്‌ത്തി. രണ്ടാം ഇന്നിങ്‌സ് ബാറ്റിങ്ങിന് ഇറങ്ങിയ കേരളത്തിന് തുടക്കത്തില്‍ തന്നെ മൂന്ന് റണ്‍സെടുത്ത ക്യാപ്റ്റന്‍ അഭിഷേക് നായരുടെ വിക്കറ്റ് നഷ്ടമായി. മൂന്നാമനായെത്തിയ ആകര്‍ഷ് അഞ്ച് റണ്‍സുമായി മടങ്ങി. മൂന്നാം വിക്കറ്റില്‍ ഓപ്പണര്‍ റിയാ ബഷീറും ഷോണ്‍ റോജറും ചേര്‍ന്ന് 58 റണ്‍സ് കൂട്ടിച്ചേര്‍ത്തു. റിയാ ബഷീര്‍ 47 റണ്‍സും ഷോണ്‍ റോജര്‍ 25 റണ്‍സും എടുത്ത് പുറത്തായി. തുടര്‍ന്നെത്തിയവരില്‍ 24 റണ്‍സെടുത്ത വരുണ്‍ നയനാര്‍ക്ക് മാത്രമാണ് പിടിച്ചു നില്‍ക്കാനായത്. രോഹന്‍ നായര്‍ പത്തും ആസിഫ് അലി നാലും റണ്‍സെടുത്ത് പുറത്തായി. കളി നിര്‍ത്തുമ്പോള്‍ ഏഴ് റണ്‍സോടെ കിരണ്‍ സാഗറും റണ്ണൊന്നുമെടുക്കാതെ ഏദന്‍ ആപ്പിള്‍ ടോമും ആണ് ക്രീസില്‍.
പ്രതികരിക്കാൻ ഇവിടെ എഴുതുക: