ന്യൂദല്‍ഹി: ഭീകരവാദത്തിന് ലോകത്ത് ഒരു സ്ഥാനമില്ലെന്ന് പ്രധാനമന്ത്രി നരേന്ദ്ര മോദി. പശ്ചിമേഷ്യയിലെ സാഹചര്യം ഇസ്രയേല്‍ പ്രധാനമന്ത്രിയുമായി ചര്‍ച്ച ചെയ്തുവെന്ന് പ്രധാനമന്ത്രി സമൂഹ മാധ്യമമായ എക്‌സില്‍ അറിയിച്ചു.
സംഘര്‍ഷം ഒഴിവാക്കണമെന്നും ബന്ദികളെ സുരക്ഷിതമായി മോചിപ്പിക്കണമെന്നും നരേന്ദ്ര മോദി പറഞ്ഞു.
സമാധാനം പുനഃസ്ഥാപിക്കാനുള്ള എല്ലാ ശ്രമങ്ങളെയും ഇന്ത്യ പിന്തുണയ്‌ക്കും. മധ്യേഷ്യയില്‍ സംഘര്‍ഷം രൂക്ഷമായ സാഹചര്യത്തിലാണ് ഇസ്രയേല്‍ പ്രധാനമന്ത്രി ബെഞ്ചമിന്‍ നെതന്യാഹുവുമായി നരേന്ദ്ര മോദി ചര്‍ച്ച നടത്തിയത്.
നേരത്തേ ലെബനനിലെ ഹിസ്ബുളളയ്‌ക്ക് പിന്നാലെ യെമനിലെ ഹൂതികള്‍ക്ക് നേരെയും ഇസ്രയേല്‍ ആക്രമണം ശക്തമാക്കിയിരുന്നു. യെമനിലെ റാസ് ഇസ , ഹൊദൈദ തുറമുഖങ്ങളില്‍ ഇസ്രയേല്‍ വ്യോമാക്രമണം നടത്തി.
ഇസ്രയേലിലെ ബെന്‍ ഗുരിയോന്‍ വിമാനത്താവളത്തില്‍ ഹൂതികള്‍ ആക്രമണം നടത്തിയതിന് പിന്നാലെയാണ് ഇസ്രയേല്‍ തിരിച്ചടിച്ചത്. ഇറാന്‍ പിന്തുണയുള്ള ഹൂതി വിമതര്‍ ഈമാസം മൂന്ന് തവണയാണ് ഇസ്രയേലില്‍ മിസൈല്‍ ആക്രമണം നടത്തിയത്. ശത്രു എവിടെ ആയാലും ആക്രമിക്കുമെന്ന് ഇസ്രയേല്‍ വ്യക്തമാക്കി. ലെബനനില്‍ ഇസ്രയേല്‍ കരയുദ്ധത്തിന് തയാറെടുക്കുന്നുവെന്നാണ് വിവരം.
