ന്യൂദല്ഹി: ബുഡാപെസ്റ്റില് നടന്ന 45-ാമത് ചെസ് ഒളിംപ്യാഡില് കിരീടം ചൂടിയ ഭാരത പുരുഷ – വനിത ടീം അംഗങ്ങള് പ്രധാനമന്ത്രി നരേന്ദ്രമോദിയുമായി കൂടിക്കാഴ്ച നടത്തി. ഇന്നലെ വൈകിട്ട് പ്രധാനമന്ത്രിയുടെ ഔദ്യോഗിക വസതിയിലായിരുന്നു കൂടിക്കാഴ്ച.
പുരുഷ ടീം അംഗങ്ങളായ ഡി. ഗുകേഷ്, അര്ജുന് എറിഗൈസി, ആര്. പ്രജ്ഞാനാനന്ദ, വിദിത് ഗുജറന്തി, വനിത ടീം അംഗങ്ങളായ അഭിജിത് കുന്റെ, ആര്. വൈശാലി, ഡി. ഹരിക, താനിയ സച്ച്ദേവ്, ദിവ്യ ദേശ്മുഖ്, വന്തിക അഗര്വാള് എന്നിവര് കൂടിക്കാഴ്ചയില് പങ്കെടുത്തു.
പ്രധാനമന്ത്രിയുടെ അഭിനന്ദനം ഏറ്റുവാങ്ങിയ താരങ്ങള് അദ്ദേഹത്തിന് ഒരു ചെസ് ബോര്ഡ് സമ്മാനിച്ചു. അര്ജുന് എറിഗൈസിയും ആര്. പ്രജ്ഞാനാനന്ദയും തമ്മില് പ്രധാനമന്ത്രിക്ക് മുന്നില് ചെസ് കളിക്കുകയും ചെയ്തു. താരങ്ങളുമായി ആശയവിനിമയം നടത്തിയ പ്രധാനമന്ത്രി കൂടുതല് വിജയങ്ങള് കൈവരിക്കട്ടെയെന്ന് ആശംസിച്ചു.
