കളമശ്ശേരി: തൃക്കാക്കര വാമനമൂര്ത്തി ക്ഷേത്രത്തിലെ തിരുവോണ മഹോത്സവത്തിന്റെ ഭാഗമായി ഇന്ന് തിരുവോണ സദ്യ നടക്കും. രാവിലെ 6.30ന് ചന്ദനം ചാര്ത്ത് – വിശ്വരൂപമായ ത്രിവിക്രമന്, 7.30ന് മഹാബലി എതിരേല്പ്പ്, 8.30ന് 9 ഗജവീരന്മാര് അണിനിരക്കുന്ന ശ്രീബലി. 10.30ന് കളമശ്ശേരി നഗരസഭ സമര്പ്പിക്കുന്ന തിരുവോണ സദ്യ. വൈകിട്ട് 4.30ന് കൊടിയിറക്കല്, ആറാട്ട്.
ഇന്ന് 20,000 പേര്ക്കാണ് സദ്യ ഒരുക്കുന്നത്. രാവിലെ 10.30ന് ആരംഭിക്കുന്ന സദ്യ വൈകിട്ട് 4 വരെ നീളും. പുക്കാട്ടുപടി സ്വദേശി ജയപ്രകാശ് ആണ് 22 ഇനങ്ങളുള്ള തിരുവോണ സദ്യ തയ്യാറാക്കുന്നത്. ജയപ്രകാശിനൊപ്പം 30 പേര് സഹായികളുണ്ട്. 2500 കിലോ അരി സദ്യക്ക് ഉപയോഗിക്കും. ഓണാഘോഷത്തിന് കളമശ്ശേരി നഗരസഭ 10 ലക്ഷം നല്കുന്നുണ്ട്. ഉത്സവത്തിന്റെ നടത്തിപ്പ് ചുമതല തൃക്കാക്കര മഹാക്ഷേത്ര ഉപദേശക സമിതിക്കാണ്. ഉപദേശക സമിതി ഭാരവാഹികളായ പ്രമോദ് തൃക്കാക്കര, ശശികുമാര് വര്മ, വി.ആര്. നീലകണ്ഠന്, മോഹന്കുമാര് കെ, വി.എന്. വാസുദേവന് എന്നിവര്ക്കൊപ്പം വിവിധ ഉപസമിതി ഭാരവാഹികളും തിരുവിതാംകൂര് ദേവസ്വം ബോര്ഡ് അസി. കമ്മീഷണര് ജയശ്രീ, ദേവസ്വം അഡ്മിനിസ്ട്രേഷന് ഓഫീസര് അമ്പിളി ദേവി എന്നിവരുടെയും മേല്നോട്ടത്തിലാണ് പ്രവര്ത്തനങ്ങള് നടക്കുന്നത്.
