രംഗറെഡ്ഡി: സംവരണത്തെയും സിഖ് സമുദായത്തെയും കുറിച്ച് അടുത്തിടെ യുഎസിൽ കോൺഗ്രസ് എംപി രാഹുൽ ഗാന്ധി നടത്തിയ പരാമർശങ്ങളെ നിശിതമായി വിമർശിച്ച് ബിജെപി നേതാവും മുൻ കേന്ദ്രമന്ത്രിയുമായ രാജീവ് ചന്ദ്രശേഖർ. രാഹുൽ നിലകൊള്ളുന്നത് ഇന്ത്യയ്ക്കെതിരായി സംസാരിക്കുന്നവർക്ക് വേണ്ടിയാണെന്ന് ചന്ദ്രശേഖർ ആരോപിച്ചു. കഴിഞ്ഞ ദിവസം രംഗറെഡ്ഡിയിൽ സംഘടിപ്പിച്ച ബിജെപിയുടെ അംഗത്വ യജ്ഞത്തിൽ പങ്കെടുത്ത് സംസാരിക്കുകയായിരുന്നു രാജീവ് ചന്ദ്രശേഖർ.
“ പത്ത് ദിവസം മുമ്പ് രാഹുൽ ഗാന്ധി യുഎസിൽ എന്ത് പറയും, അല്ലെങ്കിൽ എന്ത് ചെയ്യുമെന്ന് നിങ്ങൾ എന്നോട് ചോദിച്ചിരുന്നെങ്കിൽ, എനിക്ക് നിങ്ങളോട് പ്രവചിക്കാമായിരുന്നു, അദ്ദേഹം ഇന്ത്യയ്ക്കെതിരായ ആളുകളുമായി ഒരു വേദിയിൽ പോകും, അദ്ദേഹം ഇന്ത്യയ്ക്കെതിരായ കാര്യങ്ങൾ പറയും. അദ്ദേഹം ദിവസവും നുണകൾ പറയും,” – ചന്ദ്രശേഖർ പറഞ്ഞു.
എന്നാൽ ഇത് മുന്നോട്ട് പോകുന്ന ഇന്ത്യയാണ്. അതേ സമയം രാഹുൽ ഗാന്ധി ഇന്ത്യക്കെതിരായി സംസാരിക്കുന്നവർക്കുവേണ്ടിയാണ് സംസാരിക്കുന്നത്. താൻ അതിനെ നുണകളുടെ രാഷ്ട്രീയവും നമ്മുടെ വികസന രാഷ്ട്രീയവും എന്ന് വിളിക്കുന്നുവെന്നും അദ്ദേഹം കൂട്ടിച്ചേർത്തു.
നേരത്തെ, കോൺഗ്രസ് നേതാവിന്റെ പരാമർശത്തെ വിമർശിച്ച ആഭ്യന്തരമന്ത്രി അമിത് ഷാ ദേശവിരുദ്ധ കാര്യങ്ങൾ സംസാരിക്കുന്നത് രാഹുൽ ഗാന്ധിയുടെയും കോൺഗ്രസ് പാർട്ടിയുടെയും ശീലമായി മാറിയെന്ന് പറഞ്ഞു. ഇത്തരത്തിൽ വിവേചനത്തെക്കുറിച്ച് സംസാരിക്കുന്നത് കോൺഗ്രസ് നേതാവിന്റെ ഭിന്നിപ്പിന്റെ ചിന്തയാണ് കാണിക്കുന്നതെന്ന് ആഭ്യന്തരമന്ത്രി കുറ്റപ്പെടുത്തിയിരുന്നു.
