കൊച്ചി: അക്ഷയ പുസ്തകനിഥി, എബനേസര് എഡ്യൂക്കേഷണല് അസോസിയേഷനുമായി സഹകരിച്ച് നല്കുന്ന പ്രൊഫ. എം.പി. മന്മഥന് പുരസ്കാരത്തിന് കഥാകാരന് ടി. പത്മനാഭന് അര്ഹനായി. ഒരു ലക്ഷം രൂപയും ശില്പവും സാക്ഷ്യപത്രവുമടങ്ങുന്നതാണ് പുരസ്കാരം. എം. ലീലാവതി, വൈശാഖന്, പായിപ്ര രാധാകൃഷ്ണന് എന്നിവരടങ്ങുന്ന സമിതിയാണ് വിധി നിര്ണയം നടത്തിയത്.
പ്രൊഫ. മന്മഥന്റെ നേതൃത്വത്തിലാരംഭിച്ച അക്ഷയ പുസ്തകനിധി കുട്ടികളുടെ സര്ഗാത്മകപോഷണത്തിനും, കുട്ടികളുടെ അഭയകേന്ദ്രങ്ങളില് അക്ഷരജ്യോതിസു തെളിക്കാനും, മറുനാടന് മലയാളി സമാജങ്ങളെ ആദരിക്കാനുമുള്ള വൈവിധ്യമാര്ന്ന പ്രവര്ത്തനങ്ങളിലേര്പ്പെട്ടുവരുന്നു. അക്ഷയ പുസ്തകനിധി പ്രസിഡന്റ് പായിപ്ര രാധാകൃഷ്ണന്റെ അധ്യക്ഷതയില് ഒക്ടോബര് ആദ്യവാരം എറണാകുളം ഭാരത് ടൂറിസ്റ്റ് ഹോമില് നടക്കുന്ന എം. പി. മന്മഥന് അനുസ്മരണ സമ്മേളനത്തില് ഗോവ ഗവര്ണര് പി.എസ്. ശ്രീധരന്പിള്ള പുരസ്കാരം സമര്പ്പിക്കും.
