തിരുവനന്തപുരം: സമാനമായ കാഴ്‌ച്ചപാടും കേരളത്തിന്റെ തലസ്ഥാന നഗരിയെ വികസിപ്പിക്കുകയെന്ന ലക്ഷ്യവും തിരുവനന്തപുരം കൊമ്പന്‍സിനേയും അദാനിയേയും ഒരുമിപ്പിച്ചു.
അദാനി കൊമ്പന്‍സിന്റെ ടൈറ്റില്‍ സ്‌പോണ്‍സര്‍ ആകും. കൊമ്പന്‍സും അദാനിയും തമ്മിലുള്ള മൂന്ന് വര്‍ഷത്തേക്കുള്ള സഹകരണം തിരുവനന്തപുരത്ത് ഔദ്യോഗികമായി പ്രഖ്യാപിച്ചു. മുഖ്യാതിഥിയായ വിദ്യാഭ്യാസ മന്ത്രി വി. ശിവന്‍കുട്ടി ലോഗോ അവതരിപ്പിച്ചപ്പോള്‍ ആന്റണിരാജു എംഎല്‍എ ഫ്രാഞ്ചൈസിയുടെ നായകനെ പ്രഖ്യാപിച്ചു.
ടൈറ്റില്‍ സ്‌പോണ്‍സറായ അദാനിക്കുവേണ്ടി തിരുവനന്തപുരം അന്താരാഷ്‌ട്ര വിമാനത്താവളത്തിന്റെ മുഖ്യ വിമാനത്താവള ഓഫീസര്‍ രാഹുല്‍ ഭക്തകോടിയും സഹ സ്‌പോണ്‍സറും ഹെല്‍ത്ത്‌കെയര്‍ പങ്കാളിയുമായ കിംസ് ഹെല്‍ത്ത് കെയറിനെ പ്രതിനിധീകരിച്ച് സിഇഒ ജെറി ഫിലിപ്പും പങ്കെടുത്തു. തിരുവനന്തപുരം കൊമ്പന്‍സിന്റെ ബോര്‍ഡ് അംഗം ജി. വിജയരാഘവന്‍ സ്വാഗതം പറഞ്ഞപ്പോള്‍ ക്ലബിന്റെ മാനേജിങ് ഡയറക്ടറായ കെ.സി. ചന്ദ്രഹാസന്‍ സ്‌പോണ്‍സര്‍മാരെ അവതരിപ്പിച്ചു. ടീം ജെഴ്‌സിയും ഫ്രാഞ്ചൈസിയുടെ പതാകയും അവതരിപ്പിച്ച ചടങ്ങില്‍ ടീം ഗാനത്തിന്റെ ലിറിക്കല്‍ വീഡിയോയും പുറത്തുവിട്ടു.
പത്രസമ്മേളനത്തില്‍ തിരുവനന്തപുരം കൊമ്പന്‍സ്- അദാനി സംയുക്ത ലോഗോ പ്രകാശനം ചെയ്തു. ഈ പങ്കാളിത്തത്തിന്റെ ഭാഗമായുള്ള എല്ലാ പ്രവര്‍ത്തനങ്ങളിലും ഈ ലോഗോ ഇനി മുതല്‍ ഉപയോഗിക്കും. ബ്രസീലിന്റെ പാട്രിക് മോട്ടയെ തിരുവനന്തപുരം കൊമ്പന്‍സിന്റെ നായകനായി പരിശീലകന്‍ സെര്‍ജിയോ അലെക്‌സാന്‍ദ്രേ വീഡിയോ സന്ദേശത്തിലൂടെ പ്രഖ്യാപിച്ചു.
സംസ്ഥാന തലസ്ഥാനത്തിലെ ആദ്യത്തെ പ്രൊഫഷണല്‍ ക്ലബ് ആയ തിരുവനന്തപുരം കൊമ്പന്‍സ് ഫുട്ബോള്‍ ക്ലബ് കളിയോട് താല്‍പര്യമുള്ളതും പ്രമുഖരുമായ ടി.ജെ. മാത്യു, കെ.സി. ചന്ദ്രഹാസന്‍, ഡോ എം.ഐ. സഹദ്ദുള്ള, ജി. വിജയരാഘവന്‍, ആര്‍. അനില്‍കുമാര്‍, എന്‍.എസ്. അഭയകുമാര്‍ എന്നിവരുടെ സ്വപ്നസാഫല്യമാണ്.
