തിരുവനന്തപുരം: തനിക്കെതിരെ ഉളള ആരോപണങ്ങളില്‍ താന്‍ നിരപരാധിയെന്ന് അന്വേഷണത്തില്‍ തെളിഞ്ഞാല്‍ ആരോപണം ഉന്നയിച്ചവര്‍ക്കെതിരെ കേസെടുക്കണമെന്ന് എഡിജിപി എം.ആര്‍.അജിത് കുമാര്‍. ഇക്കാര്യം ആവശ്യപ്പെട്ട് മുഖ്യമന്ത്രിക്ക് എഡിജിപി കത്ത് നല്‍കി.
ആരോപണം തനിക്കും കുടുംബത്തിനും മാനഹാനി ഉണ്ടാക്കി. നിരപരാധിത്വം തെളിഞ്ഞാല്‍ സര്‍ക്കാര്‍ കേസ് ഫയല്‍ ചെയ്യണം. സെഷന്‍സ് കോടതിയില്‍ സര്‍ക്കാരിനു തന്നെ കേസ് ഫയല്‍ ചെയ്യാമെന്നതുള്‍പ്പെടെ നിയമനടപടികളുടെ വിശദാംശങ്ങള്‍ കൂടി കത്തില്‍ ഉള്‍പ്പെടുത്തിയിട്ടുണ്ട്.
അതേസമയം, എഡിജിപിക്കെതിരായ പി.വി അന്‍വര്‍ എംഎല്‍എയുടെ ആരോപണങ്ങളില്‍ അന്വേഷണം നടക്കുകയാണ്. പ്രത്യേക അന്വേഷണ സംഘം എഡിജിപിയുടെ മൊഴിയെടുക്കാനുള്ള നീക്കം നടത്തുന്നതിനിടെയാണ് അജിത് കുമാര്‍ മുഖ്യമന്ത്രിക്ക് കത്തയച്ചത്.
തന്നെ സ്ഥാനത്തുനിന്ന് മാറ്റിനിര്‍ത്തി അന്വേഷണം നടത്തണമെന്ന് ആവശ്യപ്പെട്ട് അജിത് കുമാര്‍ നേരത്തേ മുഖ്യമന്ത്രിക്ക് കത്തയച്ചിരുന്നു.
