മലപ്പുറം: ചത്ത കന്നുകാലികളുടെ ജഡം നാടുകാണി ചുരത്തില്‍ തള്ളി. വഴിക്കടവ് ആനമറി നാടുകാണി ചുരത്തില്‍ ഒന്നാം വളവിന് താഴെയാണ് രണ്ട് ചത്തപോത്തുകളെ തള്ളിയ നിലയില്‍ കണ്ടെത്തിയത്. എടക്കര കാലിചന്തയില്‍ കാലികളെ ഇറക്കി പോവുന്ന ലോറിയില്‍ നിന്നാണ് ചുരത്തില്‍ ചത്ത പോത്തുകളെ തള്ളിയതെന്ന് പ്രദേശവാസികള്‍ പറയുന്നു.
പ്രദേശത്ത് അസഹ്യമായ ദുര്‍ഗന്ധം പടര്‍ന്നതോടെ നടത്തിയ പരിശോധനയിലാണ് കന്നുകാലികളുടെ ജഡം കണ്ടെത്തിയത്. നാടുകാണി ചുരത്തിലൂടെ മഴ സമയത്ത് ചെറിയ ചോലകള്‍ ഒഴുകുന്ന സ്ഥലമാണിത്. ചോല വെള്ളം ഒഴുകുന്ന സ്ഥലത്ത് മൂന്ന് ജലനിധി പദ്ധതികളുമുണ്ട്. ആനമറി പ്രദേശവാസികളും ചുരത്തിലെ യാത്രക്കാരും അസഹ്യമായ ദുര്‍ഗന്ധത്തെ തുടര്‍ന്ന് പ്രദേശത്ത് പരിശോന നടത്തിയപ്പോഴാണ് മൂന്ന് ദിവസം പഴക്കമുള്ള രണ്ട് പോത്തുകളെ ചത്ത് അഴുകാന്‍ തുടങ്ങിയ നിലയില്‍ കണ്ടത്.
