കൊച്ചി: നടനും എംഎൽഎയുമായ മുകേഷിനെതിരേ വീണ്ടും ഗുരുതര ആരോപണം. ജൂനിയൽ ആര്ട്ടിസ്റ്റ് സന്ധ്യയാണ് മുകേഷിനെതിരേ ഇപ്പോള് രംഗത്ത് വന്നിരിക്കുന്നത്. തന്റെ സുഹൃത്തായ ഒരു ജൂനിയര് ആര്ട്ടിസ്റ്റിന്റെ വീട്ടിലെത്തിയ മുകേഷ് മോശമായി പെരുമാറിയെന്നും അവർ അയാളെ അടിച്ചു പുറത്താക്കിയെന്നുമാണ് സന്ധ്യയുടെ ആരോപണം.
മുകേഷ് തന്റെ സുഹൃത്തിന്റെ മേല്വിലാസം കണ്ട് പിടിച്ച് അവരുടെ വീട്ടിലെത്തി. സുഹൃത്തിന്റെ അമ്മ മാത്രമായിരുന്നു അവിടെ ഉണ്ടായിരുന്നത്. സുഹൃത്ത് പുറത്തായിരുന്നു. മുകേഷ് അമ്മയോടെ വളരെ മോശമായാണ് പെരുമാറിയത്. പ്രൊഡക്ഷന് കണ്ട്രോളര് വിച്ചുവിനെതിരേയും സന്ധ്യ ആരോപണം ഉന്നയിച്ചു. വഴങ്ങിയാല് മാത്രമേ സിനിമയില് അവസരം നല്കൂവെന്നും ഇല്ലെങ്കില് ജോലിയില്ലാതെ വീട്ടിലിരിക്കുമെന്ന് അദ്ദേഹം പറഞ്ഞു.
അഭിനയ മോഹം കൊണ്ടാണ് സിനിമയിലെത്തയത്. ഞാന് ആകെ ഒരു സിനിമ മാത്രമേ ചെയ്തിട്ടുള്ളൂ. ‘അമല’ എന്ന ചിത്രത്തില്. അവസരം ലഭിക്കണമെങ്കില് വഴങ്ങണമെന്നാണ് അയാൾ പറഞ്ഞത്. ഇല്ലെങ്കിൽ പണിയില്ലാതെ വീട്ടിലിരിക്കുമെന്നും പറഞ്ഞു. എനിക്ക് അങ്ങനെ അവസരം വേണ്ടെന്ന് പറഞ്ഞു. സിനിമ മാത്രമാണ് തന്റെ ലക്ഷ്യമെന്ന് പറഞ്ഞതോടെ അവസരങ്ങളില്ലാതായെന്നും സന്ധ്യ പറയുന്നു.
അഭിനയത്തിനായി ബന്ധപ്പെട്ടവരുമായി സംസാരിക്കുമ്പോൾ അവർ ഫോട്ടോസ് ചോദിക്കും. എന്നാൽ കഥാപാത്രത്തെക്കുറിച്ചോ, പ്രൊജക്ടിനെക്കുറിച്ചോ ചോദിച്ചാൽ അവർ ഒന്നും പറയുകയില്ല. ഫോട്ടോ കണ്ടാൽ അടുത്തതായി അവർ എക്സ്പോസിംഗ് വസ്ത്രങ്ങൾ ധരിക്കാൻ തയ്യാറാണോ എന്ന് ചോദിക്കും. അത്തരത്തിലുള്ള സീനുകൾ അഭിനയിക്കാൻ തയ്യാറാണോ എന്ന് ചോദിക്കും. ഇത് പറ്റില്ലെന്ന് പറഞ്ഞാൽ അഡ്ജസ്റ്റ്മെന്റിന് തയ്യാറാണോ എന്നതാണ് അടുത്ത ചോദ്യം. അങ്ങിനെ ആണെങ്കിൽ മാത്രമേ നമുക്ക് അഭിനയിക്കാൻ അവസരം ലഭിക്കുകയുള്ളൂ. അല്ലെങ്കിൽ പാഷനും പിടിച്ച് വീട്ടിൽ ഇരിക്കണം എന്നും സന്ധ്യ പറഞ്ഞു.
വേതനം ലഭിക്കുന്നതിലും വലിയ ബുദ്ധിമുട്ടുകളാണ് നേരിടാറുള്ളത്. തുച്ഛമായ ശമ്പളമാണ് ലഭിക്കുക. ഒരു പരസ്യചിത്രത്തിൽ അഭിനയിക്കാൻ 8000 രൂപ ആയിരുന്നു നൽകാമെന്ന് വാഗ്ദാനം ചെയ്തത്. എന്നാൽ 2500 രൂപയാണ് നൽകിയതെന്നും സന്ധ്യ വ്യക്കമാക്കി.
