വാഷിംഗ്ടണ്: അന്താരാഷ്ട്ര ബഹിരാകാശ നിലയത്തില് നിന്നുള്ള സുനിത വില്യംസിന്റെയും ബുച്ച് വില്മോറിന്റെയും മടക്കം അടുത്ത വര്ഷം. ‘അടുത്ത ഫെബ്രുവരിയില് ബുച്ചും സുനിതയും ക്രൂ9 നൊപ്പം മടങ്ങിയെത്തുമെന്നും സ്റ്റാര്ലൈനര് ജീവനക്കാരില്ലാതെ മടങ്ങുമെന്നും നാസ തീരുമാനിച്ചു,’ നാസ അഡ്മിനിസ്ട്രേറ്റര് ബില് നെല്സണ് മാധ്യമപ്രവര്ത്തകരോട് പറഞ്ഞു.
2025 ഫെബ്രുവരി വരെ ഇരുവര്ക്കും രാജ്യാന്തര ബഹിരാകാശ നിലയത്തില് കാത്തിരിക്കേണ്ടിവരും. ഈ വര്ഷം ജൂണ് ആറിനാണ് ബോയിംഗിന്റെ സ്റ്റാര്ലൈനര് പേടകത്തില് സുനിതയും ബുച്ചും അന്താരാഷ്ട്ര ബഹിരാകാശ നിലയത്തില് എത്തിയത്. ഒരാഴ്ചയ്ക്കകം മടങ്ങാനായിരുന്നു പദ്ധതി എന്നാല് വിക്ഷേപണത്തിന് പിന്നാലെ സ്റ്റാര്ലൈനര് സര്വ്വീസ് മൊഡ്യൂളിലെ റിയാക്ഷന് കണ്ട്രോള് ത്രസ്റ്ററുകളിലുണ്ടായ ഹീലിയം ചോര്ച്ചയാണ് ദൗത്യത്തെ പ്രതിസന്ധിയിലാക്കിയത്.
വാണിജ്യ ആവശ്യങ്ങള്ക്കായി സ്റ്റാര്ലൈനര് എങ്ങനെ ഉപയോഗിക്കാം എന്നതിനെക്കുറിച്ചാണ് നാസയുമായി ചേര്ന്നുളള പരീക്ഷണം. നാസയുടെ ഈ ദൗത്യത്തിന് പേര് നല്കിയിരുന്നത് ക്രൂ ഫ്ളൈറ്റ് ടെസ്റ്റ് എന്നാണ്. ലോകമെമ്പാടുമുള്ള വിമാനങ്ങള്, റോട്ടര്ക്രാഫ്റ്റുകള്, റോക്കറ്റുകള്, ഉപഗ്രഹങ്ങള്, മിസൈലുകള് എന്നിവ രൂപകല്പ്പന ചെയ്യുകയും നിര്മിക്കുകയും വില്ക്കുകയും ചെയ്യുന്ന അമേരിക്കന് ആസ്ഥാനമായ ബഹുരാഷ്ട്ര കോര്പറേഷനാണ് ബോയിങ് കമ്പനി. ഈ ദൗത്യത്തോടെ ബഹിരാകാശത്തേക്കുള്ള പരീക്ഷണ ദൗത്യത്തില് പേടകം പറത്തുന്ന ആദ്യ വനിതയായി സുനിത മാറി.
ഇന്ത്യന് വംശജയായ സുനിതാ വില്യംസിന്റെ മൂന്നാമത്തെ ബഹിരാകാശ യാത്രയണിത്. 2006 ഡിസംബര് ഒമ്പതിനാണ് ഡിസ്കവറി ബഹിരാകാശ പേടകത്തില് സുനിത വില്യംസ് തന്റെ ആദ്യത്തെ ബഹിരകാശ യാത്ര നടത്തിയത്. തുടര്ന്ന് 2012ല് അവര് രണ്ടാമത്തെ യാത്ര നടത്തി. നാസയുടെ കണക്കുപ്രകാരം അവര് ബഹിരാകാശത്ത് 322 ദിവസം ചിലവഴിച്ചിട്ടുണ്ട്. ഏഴ് ബഹിരകാശനടത്തത്തിലൂടെ 50 മണിക്കൂര് 40 മിനുട്ട് ചിലവഴിച്ച ആദ്യ വനിത ബഹിരാകാശ യാത്രിക എന്ന റെക്കോര്ഡും സുനിതക്ക് സ്വന്തമാണ്. ഗുജറാത്തിലെ മെഹ്സാന ജില്ലയിലെ ജുലാസാനില് ജനിച്ച സുനിത പിന്നീട് അമേരിക്കയിലേക്ക് കുടിയേറുകയായിരുന്നു.
