ഖാഠ്മണ്ഡു : ന്യൂഡഹി : നേപ്പാളിൽ വെള്ളിയാഴ്ചയുണ്ടായ ബസ് അപകടത്തിൽ മരിച്ചവരുടെ എണ്ണം 27 ആയി. ഹൈവേയിലൂടെ പോവുകയായിരുന്ന ബസ് നിയന്ത്രണം വിട്ട് മർസ്യങ്ങാടി പുഴയിലേക്ക് മറിഞ്ഞാണ് അപകടമുണ്ടായത്. കൊല്ലപ്പെട്ടവരിൽ 24 പേർ മഹാരാഷ്‌ട്ര സ്വദേശികളാണെന്ന് തിരിച്ചറിഞ്ഞിട്ടുണ്ട്. ഇവരുടെ മൃതദേഹങ്ങൾ ഇന്ന് ഇന്ത്യൻ എയർഫോഴ്സ് വിമാനത്തിൽ മഹാരാഷ്‌ട്രയിലേക്ക് കൊണ്ടുപോകും.
മഹാരാഷ്‌ട്ര മുഖ്യമന്ത്രി ഏകനാഥ് ഷിൻഡെ കേന്ദ്ര ആഭ്യന്തര മന്ത്രി അമിത് ഷായുമായും മറ്റ് ഉദ്യോഗസ്ഥരുമായും വിവരങ്ങൾ സംസാരിച്ചു. മൃതദേഹങ്ങൾ നാട്ടിലെത്തിക്കാൻ നോഡൽ ഓഫീസറെയും നിയമിച്ചിട്ടുണ്ട്.ആഭ്യന്തര മന്ത്രിയുടെ ഇടപെടലിനെത്തുടർന്ന് ഇന്ത്യൻ വ്യോമസേനയുടെ വിമാനത്തിനുള്ള ക്രമീകരണങ്ങൾ ഏർപ്പെടുത്തിയിട്ടുണ്ടെന്നും ഉത്തർപ്രദേശിൽ നിന്ന് ഇന്ത്യൻ എയർഫോഴ്സ് വിമാനം നേപ്പാളിലേയ്‌ക്ക് പോകുമെന്നും മുഖ്യമന്ത്രിയുടെ ഓഫീസ് അറിയിച്ചു. മുംബൈയിൽ നിന്ന് 470 കിലോമീറ്റർ അകലെയുള്ള ജൽഗാവ് ജില്ലയിലെ വരൻഗാവ്, ദരിയാപൂർ, തൽവേൽ, ഭുസാവൽ എന്നിവിടങ്ങളിൽ നിന്നുള്ളവരാണ് അപകടത്തിൽപ്പെട്ടത്.
പരിക്കേറ്റ യാത്രക്കാരെയും ഇന്ന് ഗോരഖ്പൂരിൽ എത്തിക്കുമെന്ന് മഹാരാഷ്‌ട്ര ഡിസാസ്റ്റർ മാനേജ്‌മെൻ്റ് ഡയറക്ടർ ലാഹു മാലി പറഞ്ഞു. ഇതിനായും എയർഫോഴ്സ് വിമാനങ്ങൾ ക്രമീകരിച്ചു. അപകടത്തിൽപ്പെട്ടവരെ ഗോരഖ്പൂരിൽ നിന്ന് നാസിക്കിലെത്തിക്കാനുള്ള വിമാനത്തിന്റെ ചെലവ് സംസ്ഥാന സർക്കാർ വഹിക്കും.
അപകടത്തിൽപ്പെട്ട സംഭവത്തിൽ 16 പേർ സംഭവസ്ഥലത്തും 11 പേർ ചികിത്സയ്‌ക്കിടെയുമാണ് മരിച്ചത് . . പൊഖാറയിൽ നിന്ന് കാഠ്മണ്ഡുവിലേക്ക് പോകുകയായിരുന്ന ബസാണ് അപകടത്തിൽപ്പെട്ടത്. ഡ്രൈവറും രണ്ട് സഹായികളും ഉൾപ്പെടെ 43 പേരാണ് ബസിലുണ്ടായിരുന്നത്. പരിക്കേറ്റവർ ത്രിഭുവൻ യൂണിവേഴ്‌സിറ്റി ടീച്ചിംഗ് ഹോസ്പിറ്റലിൽ ചികിത്സയിലാണ്.
പ്രതികരിക്കാൻ ഇവിടെ എഴുതുക: