ചൂരൽമല : വയനാട്ടിലെ ഉരുള്പൊട്ടലുണ്ടായ ചൂരൽമലയില് നിന്ന് നാലു ലക്ഷം രൂപയുടെ നോട്ടുകെട്ടുകള് കണ്ടെത്തി അഗ്നി രക്ഷാസേന. ചൂരല് മലയിലെ വെള്ളാര്മല സ്കൂളിന് പുറകിൽ നിന്നായി മലവെളളം കുത്തിയൊലിച്ചിറങ്ങിയ പാതയിൽ പാറക്കൂട്ടങ്ങൾക്കിടയിൽ തെരച്ചിൽ നടത്തിയ രക്ഷാപ്രവർത്തകരാണ് കവറിൽ മണ്ണും ചെളിയും പിടിച്ചുകിടന്ന നോട്ടുകൾ കണ്ടെത്തിയത്. പ്ലാസ്റ്റിക് കവറില് പൊതിഞ്ഞ നിലയിലായിരുന്നു നോട്ടുകളുണ്ടായിരുന്നത്. പാറക്കെട്ടില് കുടുങ്ങി കിടന്നതിനാലാണ് ഒഴുകി പോവാഞ്ഞതെന്നും അഗ്നിരക്ഷാ സേനാംഗങ്ങള് പറഞ്ഞു.
പ്ലാസ്റ്റിക് കവറിലായതിനാല് കൂടുതല് കേടുപാട് സംഭവിച്ചിട്ടില്ല. എന്നാല്, ചെളി നിറഞ്ഞ നിലയിലാണ് നോട്ടുകെട്ടുകളുള്ളത്. 500ന്റെ നോട്ടുകള് അടങ്ങിയ ഏഴ് കെട്ടുകളും 100ന്റെ നോട്ടുകളടങ്ങിയ അഞ്ച് കെട്ടുകളുമാണ് വച്ചിരുന്നതെന്ന് റീജിണൽ ഫയർ ഓഫീസർ റജീഷ് പറഞ്ഞു.
രണ്ടാഴ്ച കഴിഞ്ഞും മേഖലയിൽ തെരച്ചിൽ തുടരുകയാണ്. കല്ലുകൾക്കിടയിൽ എന്തെങ്കിലും ഉണ്ടോയെന്ന് അറിയാൻ പാറക്കല്ലുകൾക്കിടയിൽ പിക്കാസ് കൊണ്ട് മണ്ണ് കിളച്ചാണ് പരിശോധന. ഇതിനിടയിലാണ് കവർ ശ്രദ്ധയിൽപെട്ടത്. ബിസിനസ് ആവശ്യത്തിനോ മറ്റെന്തിങ്കിലും ആവശ്യത്തിനോ സൂക്ഷിച്ചിരുന്ന പണമാകാമെന്നാണ് നിഗമനം.കെട്ടിടാവശിഷ്ടങ്ങള്ക്കും പാറക്കൂട്ടങ്ങള്ക്കും വെള്ളത്തിനുമിടയിലായാണ് പണം അടങ്ങിയ കവര് കുടുങ്ങികിടന്നത്. ഫയർഫോഴ്സ് ഉദ്യോഗസ്ഥൻ സുഭാഷ് ആണ് പണം കണ്ടെത്തിയത്. പണം ആരുടേതാണെന്ന് വ്യക്തമായിട്ടില്ല. ഈ ഭാഗം മാർക്ക് ചെയ്ത് കൂടുതൽ പരിശോധന തുടരുകയാണ്.
തുടര് നടപടികള്ക്കായി പൊലീസ് തുക ഏറ്റെടുത്തു. ദുരന്തത്തില് അകപ്പെട്ടവരുടെ നിരവധി പേരുടെ പണവും മറ്റു വിലപിടിപ്പുള്ള വസ്തുക്കളും നഷ്ടമായിരുന്നു.തുക പരിശോധിച്ച് ആവശ്യമായ തുടര് നടപടി സ്വീകരിക്കുമെന്ന് അധികൃതര് അറിയിച്ചു.
