വയനാട് : ഉരുള്പൊട്ടല് രക്ഷാപ്രവര്ത്തനങ്ങളില് സജീവപങ്കാളിത്തവുമായി നാവികസേനയും. 78 സേനാംഗങ്ങളാണ് ചൂരല്മലയിലും മുണ്ടക്കൈയിലും മറ്റ് സേനാവിഭാഗങ്ങള്ക്കും സന്നദ്ധ പ്രവര്ത്തകര്ക്കുമൊപ്പം കൈമെയ് മറന്ന് അധ്വാനിക്കുന്നത്.
സേനയുടെ ഹെലികോപ്റ്ററുകളും വയനാട്, നിലമ്പൂര് മേഖലകളില് തെരച്ചില്, രക്ഷാ ദൗത്യങ്ങളില് പങ്കെടുക്കുന്നു. തെരച്ചിലിനും അവശിഷ്ടങ്ങള് നീക്കം ചെയ്യുന്നതിനും മൃതദേഹങ്ങള് വീണ്ടെടുക്കുന്നതിനുമായി രണ്ട് സംഘങ്ങളായി തിരിഞ്ഞാണ് നാവികസേനാംഗങ്ങള് പ്രവര്ത്തിക്കുന്നത്.
ഒരു സംഘം പുഴയോരം കേന്ദ്രീകരിച്ച് തെരയുമ്പോള്, മറ്റേ സംഘം മലയോര മേഖലയിലാണ് തെരച്ചില് നടത്തുന്നത്. ദുരിതബാധിതര്ക്ക് അവശ്യസാധനങ്ങള് എത്തിക്കുകയാണ് മറ്റൊരു സംഘത്തിന്റെ ചുമതല. പരിക്കേറ്റവര്ക്ക് വൈദ്യസഹായം നല്കുന്നതിന് ചൂരല്മലയില് മെഡിക്കല് പോസ്റ്റും സ്ഥാപിച്ചിട്ടുണ്ട്.
ബെയ്ലി പാലം നിര്മിച്ച ഇന്ത്യന് സൈന്യത്തിലും നാവികസേനയുടെ പ്രാതിനിധ്യമുണ്ടായിരുന്നു. മൂന്ന് ഓഫീസര്മാരും 30 സേനാംഗങ്ങളുമാണ് ഈ ദൗത്യത്തില് അണിചേര്ന്നത്.റോഡ് മാര്ഗം ദുരന്തമേഖലയിലേക്ക് രക്ഷാ ഉപകരണങ്ങള് സഹിതം എത്തിച്ചേരാന് കഴിയാതിരുന്ന പോലീസുകാരെ ഹെലികോപ്റ്ററില് സേന ലക്ഷ്യസ്ഥാനത്ത് എത്തിച്ചിരുന്നു.
കാഴ്ച കുറവായ വെല്ലുവിളി നിറഞ്ഞ കാലാവസ്ഥയില് ഹെലികോപ്റ്റര് ഉപയോഗിച്ച് നിരീക്ഷണം നടത്താനും സേനയ്ക്ക് കഴിഞ്ഞു. ഏഴിമലയിലെ ഐ.എന്.എസ് സമോറിനില് നിന്നാണ് നാവികസേനാ പ്രവര്ത്തനങ്ങളുടെ ഏകോപനം.
