കണ്ണൂര്: സി പി എമ്മിലെ വിഭാഗീയത അധികാരത്തെ ചൊല്ലിയായിരുന്നെന്നും ഈ വിഭാഗീയ കാരണമാണ് തന്റെ പേരില് ആരോപണങ്ങള് കെട്ടിവച്ചതെന്നും പാര്ട്ടി മുന് സംസ്ഥാന കമ്മിറ്റി അംഗം സികെപി പത്മനാഭന്. തന്നെ കരുതിക്കൂട്ടി പാര്ട്ടിയില് നിന്നും പുറത്താക്കിയ ആളുകളാണ് സിപിഎമ്മിനെ ഇന്നത്തെ അവസ്ഥയിലെത്തിച്ചതെന്ന് സികെപി അദ്ദേഹം പറഞ്ഞു.
കണ്ണൂരിലെ പ്രാദേശിക ടെലിവിഷന് ചാനലിന് നല്കിയ അഭിമുഖത്തിലാണ് സികെപി പത്മനാഭന് ഇക്കാര്യങ്ങള് പറഞ്ഞത്. ഇനി എത്രകാലം ജീവിക്കുമെന്നറിയില്ല. സത്യം ജനങ്ങള് അറിയണം എന്നും അദ്ദേഹം പറഞ്ഞു. താന് ശരിയുടെ പക്ഷത്തായിരുന്നു. അതാണ് തനിക്കെതിരെ നടപടിക്ക് കാരണം. അന്ന് അതിന് പിന്നില് പ്രവര്ത്തിച്ചവരാണ് ഇന്ന് പാര്ട്ടിയെ ഈ അവസ്ഥയിലെത്തിച്ചത്. അതില് സന്തോഷമുണ്ട്.
ജനങ്ങള് വെറുക്കുന്ന അവസ്ഥയില് പാര്ട്ടി എത്തിയതില് പരിശോധന വേണം. താഴെ തട്ടില് അല്ല മുകളില് തന്നെ തിരുത്തല് വേണമെന്നും സി കെ പി പത്മനാഭന് പറഞ്ഞു.
സാമ്പത്തിക ബുദ്ധിമുട്ടുണ്ടായപ്പോള് ഇഎംഎസും മന്ത്രിമാരും ശമ്പളം പകുതിയാക്കിയതുപോലുള്ള മാതൃകകളാണ് ജനം പ്രതീക്ഷിക്കുന്നത്. ടിപി ചന്ദ്രശേഖരന് വധത്തിലൂടെ എന്താണോ ഇല്ലാതാക്കാന് ശ്രമിച്ചത്, അത് വളര്ന്നു. ടിപിയെക്കാള് വലിയ പ്രസ്ഥാനമായി . ആര്എംപിയുടെ വളര്ച്ചയെ കുറിച്ച് പറയുകയായിരുന്നു അദ്ദേഹം.
പി ശശിക്കെതിരായ പരാതി തള്ളിക്കളയാനാകുന്നതായിരുന്നില്ല. പാര്ട്ടി നടപടിയെ വന്ന് 12 വര്ഷത്തിന് ശേഷമാണ് സികെപി പത്മനാഭന് ഇക്കാര്യത്തില് പ്രതികരിക്കുന്നത്.
