ക്യാപ്റ്റന് അന്ഷുമാന് സിംഗിന്റെ ഭാര്യ താന് അല്ലെന്ന് ‘ചാര്ളി’ സിനിമയില് അഭിനയിച്ച നടിയും മോഡലുമായ രേഷ്മ സെബാസ്റ്റ്യന്. അന്ഷുമാന്റെ ഭാര്യ സ്മൃതി സിംഗിന്റെ ഇന്സ്റ്റഗ്രാം അക്കൗണ്ട് എന്ന് തെറ്റിദ്ധരിച്ച് പലരും തന്റെ അക്കൗണ്ടും ചിത്രങ്ങളും ഉപയോഗിക്കുന്നതിനെതിരെയാണ് രേഷ്മ സെബാസ്റ്റിയന് രംഗത്തെത്തിയിരിക്കുന്നത്.
രാജ്യത്തിന് വേണ്ടി രക്തസാക്ഷിയായ മകനെ ഓര്ത്ത് അമ്മ വിലപിക്കുമ്പോള് ഭാര്യ ഇന്സ്റ്റഗ്രാമില് സൗന്ദര്യ പ്രദര്ശനം നടത്തുന്നു എന്ന ക്യാപ്ഷനോടെയാണ് രേഷ്മയുടെ ചിത്രങ്ങള് പ്രചരിപ്പിക്കുന്നത്. തന്റെ പേര് ഉപയോഗിച്ച് സ്മൃതി സിംഗിനെ കുറിച്ച് തെറ്റായ വിവരങ്ങള് പ്രചരിപ്പിക്കുന്നവര്ക്കെതിരെ നിയമനടപടിയുമായി മുന്നോട്ട് പോവുകയാണെന്ന് രേഷ്മ വ്യക്തമാക്കി.
”ഇത് ഇന്ത്യന് ആര്മി സൈനികനായ ക്യാപ്റ്റന് അന്ഷുമാന് സിംഗിന്റെ വിധവ സ്മൃതി സിങ്ങിന്റെ പേജോ ഇന്സ്റ്റാഗ്രാം അക്കൗണ്ടോ അല്ല. ആദ്യം പ്രൊഫൈല് വിശദാംശങ്ങളും ബയോയും വായിക്കുക. തെറ്റായ വിവരങ്ങളും വിദ്വേഷ കമന്റുകളും പ്രചരിപ്പിക്കുന്നതില് നിന്നും ദയവായി വിട്ടുനില്ക്കുക. ഇത് അസംബന്ധമാണ്.”
എന്റെ ഐഡന്റിറ്റി ഉപയോഗിച്ച് സ്മൃതി സിംഗിനെ കുറിച്ച് തെറ്റായ വിവരങ്ങള് പ്രചരിപ്പിക്കുന്നു. ഞങ്ങള് നിയമ നടപടികളുമായി മുന്നോട്ട് പോകുകയാണ്. അത്തരം ഷെയറുകള് നിങ്ങള് കണ്ടെത്തുകയാണെങ്കില് ദയവായി ഞങ്ങളെ അറിയിക്കുക, അതുവഴി ഞങ്ങള്ക്ക് റിപ്പോര്ട്ട് ചെയ്യാം” എന്നാണ് രേഷ്മ സെബാസ്റ്റ്യന് സോഷ്യല് മീഡിയയില് കുറിച്ചിരിക്കുന്നത്.
അതേസമയം, അന്ഷുമാന് സിംഗിന് കീര്ത്തിചക്ര നല്കി ആദരിച്ച സംഭവത്തെ തുടര്ന്ന് വിവാദങ്ങള് എത്തിയിരുന്നു. മകന്റെ മരണാന്തരം കിട്ടിയ ജീവനാംശം ഉള്പ്പടെ സ്മൃതി സ്വന്തം വീട്ടിലേക്ക് കൊണ്ടുപോയെന്ന് അന്ഷുമാന്റെ മാതാപിതാക്കള് തന്നെ ആരോപിച്ചിരുന്നു. പിന്നാലെ സ്മൃതി സിംഗിനെതിരെ കടുത്ത സൈബര് ആക്രമണവും നടന്നിരുന്നു.
