ലണ്ടന്: ബ്രിട്ടീഷ് പാര്ലമെന്റില് ഇക്കുറി എംപിമാരായി വിജയിച്ചവരില് 29 പേര് ഇന്ത്യന് വംശജര്. ആദ്യമായാണ് ഇന്ത്യന് വേരുകളുള്ള ഇത്രയും പേര് വിജയിച്ച് ബ്രിട്ടീഷ് പാര്ലമെന്റില് എത്തിയത്.
ബ്രിട്ടനിലെ രണ്ട് പ്രധാന പാര്ട്ടികളായ ലേബര് പാര്ട്ടിയിലും കണ്സര്വേറ്റീവ് പാര്ട്ടിയിലും അംഗങ്ങളാണ് അവര്. കഴിഞ്ഞ തവണ 15 ഇന്ത്യന് വംശജര് മാത്രമാണ് ജയിച്ചത്. ഇക്കുറി ജയിച്ച 26 എംപി മാരില് പ്രധാനികള് ഋഷി സുനക് (റിച്ച് മണ്ട് മണ്ഡലം), പ്രീതി പട്ടേല് (എസക്സിലെ വിതാം മണ്ഡലം), സുവെല്ല ബ്രോവര്മാന് (ഫെയര്ഹാം വാട്ടര്ലൂവില്ല) ശിവാനി രാജ (ലിസസ്റ്റര് ഈസ്റ്റ് മണ്ഡലം), ഡോ. നീല് ശാസ്ത്രി ഹേസ്റ്റ് (സോളിഹുള് വെസ്റ്റ് ഷേര്ലി മണ്ഡലം) എന്നിവിടങ്ങളില് വിജയിച്ചു. വരീന്ദര് ജൂസ്റ്റ്, പ്രീത് കൗര് ഗില്, തന്മന്ജിത് സിങ് ധേസി, ലിസ നാന്ഡി, സീമ മല്ഹോത്ര, ഗുരീന്ദര് സിങ്ങ് ജോസാന്, കനിഷ്ക നാരായണ്, സോണിയ കുമാര്, ജാസ് അത് വാല്, ബാഗി ശങ്കര്, സത് വീര് കൗര്, ഹര്പ്രീത് ഉപ്പല്, നദിയ വിറ്റോമി, സോജന് ജോസഫ്, ധവേന്ദ്രു മിശ്ര, സുരിന ബ്രാകര് ബ്രിഡ്ജ്, കിരിത് എന്റ് വില്സന്, ജീവുന് സാന്ദര്, വലേരി വാസ് എന്നിവരാണ് വിജയിച്ച മറ്റ് ഇന്ത്യന് വംശജര്.
2021ലെ ജനസംഖ്യ കണക്കെടുപ്പ് പ്രകാരം ഏകദേശം 10 ലക്ഷം ഇന്ത്യന് വംശജരാണ് ബ്രിട്ടനില് ഉള്ളത്.
2019ലെ തെരഞ്ഞെടുപ്പില് ലേബര് പാര്ട്ടിക്ക് ഇന്ത്യ വിരുദ്ധ നിലപാടാണ് ഉണ്ടായിരുന്നത്. യുകെയിലേക്ക് ഇന്ത്യക്കാര് കുടിയേറുന്നതിനെയും അവര് എതിര്ത്തിരുന്നു. ആ വര്ഷത്തെ തെരഞ്ഞെടുപ്പില് ലേബര് പാര്ട്ടി തോറ്റു. പക്ഷെ ഇക്കുറി ലേബര് പാര്ട്ടി ഇന്ത്യക്കാരെ കൂടുതലായി കയ്യിലെടുത്തു. കൂടുതല് ഇന്ത്യന് വംശജര്ക്ക് സീറ്റ് നല്കുകയും ചെയ്തു. അതാണ് ലേബര് പാര്ട്ടിയുടെ വന്വിജയത്തിന് കാരണമായത്.
2024ലെ തെരഞ്ഞെടുപ്പിന് കണ്സര്വേറ്റീവ് പാര്ട്ടിയെ സംബന്ധിച്ചിടത്തോളം ഒരു പ്രത്യേകതയുണ്ട്. ചരിത്രത്തില് ആദ്യമായാണ് ഒരു ഇന്ത്യന് വംശജന്റെ (ഋഷി സുനകിന്റെ) നേതൃത്വത്തില് കണ്സര്വേറ്റീവ് പാര്ട്ടി തെരഞ്ഞെടുപ്പിനെ നേരിട്ടത്.
