കോഴിക്കോട്: കെഎസ്ഇബി ഓഫീസില് അതിക്രമം നടത്തിയതിന് യൂത്ത് കോണ്ഗ്രസ് നേതാവിന്റെ വീട്ടിലെ വൈദ്യുതി കണക്ഷന് വിച്ഛേദിച്ച കെ എസ് ഇ ബി ക്കെതിരെ മനുഷ്യാവകാശ കമ്മീഷന് കേസെടുത്തു. കെഎസ്ഇബി എക്സിക്യൂട്ടീവ് എഞ്ചിനീയര് പരാതി പരിശോധിച്ച് ഏഴ് ദിവസത്തിനകം റിപ്പോര്ട്ട് സമര്പ്പിക്കണമെന്ന് കമ്മീഷന് ആക്റ്റിംഗ് ചെയര്മാനും ജുഡീഷ്യല് അംഗവുമായ കെ.ബൈജു നാഥ് ആവശ്യപ്പെട്ടു.
ഇതേത്തുടര്ന്ന് കണക്ഷന് ഇന്ന് തന്നെ പുനസ്ഥാപിക്കുമെന്ന് വൈദ്യുതി മന്ത്രി കെ കൃഷ്ണന്കുട്ടി പറഞ്ഞു.
തിരുവമ്പാടി സ്വദേശിയായ യു.സി. അജ്മല് ഉള്ളാട്ടില് എന്ന യുവാവിന്റെ വീട്ടിലെ കണക്ഷനാണ് കെ എസ് ഇ ബി വിഛേദിച്ചത്. അജ്മലിന്റെ വീട്ടിലുള്ള ബില് ഓണ്ലൈനായി അടച്ചങ്കിലും കണക്ഷന് വിഛേദിച്ചെന്നാണ് പരാതി.
കണക്ഷന് വിച്ഛേദിക്കാനെത്തിയ കെ എസ് ഇ ബി ജീവനക്കാര് അജ്മലിന്റെ മാതാവിനോട് അപമര്യാദയായി പെരുമാറിയെന്നും ആരോപണമുണ്ട്. ഇത് ചോദിക്കാന് കെ എസ് ഇ ബി ഓഫീസിലെത്തിയ അജ്മലും സഹോദരനും ഓഫീസിലെ കമ്പ്യൂട്ടര് ഉള്പ്പെടെ തകര്ക്കുകയും ജീവനക്കാരെ കയ്യേറ്റം ചെയ്യുകയുമായിരുന്നു എന്നാണ് കേസ്. പിന്നാലെ യുവാക്കളുടെ വീട്ടിലെ വൈദ്യുതി കണക്ഷന് വിച്ഛേദിക്കാന് കെ എസ് ഇ ബി ചെയര്മാന് ഉത്തരവിട്ടു. തുടര്ന്ന് ഇന്നലെ ഇരുട്ടില് മെഴുകുതിരി കത്തിച്ച് പ്രതിഷേധിക്കുകയുണ്ടായി അജ്മലിന്റെ മാതാപിതാക്കള്. ഇന്നും സ്വന്തം വീടിന് മുന്നില് ഇവര് സമരം തുടരുകയാണ്. കണക്ഷന് പുനസ്ഥാപിക്കും വരെ സമരം തുടരുമെന്നാണ് ഇവരുടെ നിലപാട്. പിന്തുണയുമായി യൂത്ത് കോണ്ഗ്രസുമുണ്ട്.
