തിരുവനന്തപുരം : എസ്എഫ്ഐയുടെ ക്രൂരതകളെക്കുറിച്ച് മാധ്യമങ്ങള്‍ ചോദിക്കുന്നതില്‍ സന്തോഷമെന്ന് ഗവര്‍ണര്‍ ആരിഫ് മുഹമ്മദ് ഖാന്‍. സമരം ചെയ്യാനുള്ള സ്വാതന്ത്ര്യം എസ്എഫ്ഐയ്‌ക്കുണ്ടെങ്കിലും നിയമം കൈയിലെടുക്കരുത്. നിയമം കൈയിലെടുക്കുന്ന ക്രിമിനലുകളെ നേരിടാന്‍ തയാറാണെന്നും ഗവര്‍ണര്‍ പറഞ്ഞു.
സര്‍വകലാശാല ചട്ടങ്ങള്‍ ലംഘിക്കാന്‍ ആരേയും അനുവദിക്കില്ലെന്നും ഗവര്‍ണര്‍ പറഞ്ഞു. അക്രമങ്ങളുടെ ഭാഗമായ സംഘടനയിലുള്ളവരെ സെനറ്റിലേക്ക് താന്‍ നാമനിര്‍ദേശം ചെയ്യില്ല. തനിക്ക് എസ്എഫ്ഐയെ ഭയമില്ലെന്നും ക്യാമ്പസിനുള്ളില്‍ നിയമലംഘനം നടത്താന്‍ ആരേയും അനുവദിക്കരുതെന്ന് സര്‍വകലാശാല വൈസ് ചാന്‍സലര്‍മാര്‍ക്ക് നിര്‍ദേശം നല്‍കിയിട്ടുണ്ടെന്നും ആരിഫ് മുഹമ്മദ് ഖാന്‍ മാധ്യമങ്ങളോട് പറഞ്ഞു.
അതേസമയം എസ്എഫ്ഐ തിരുത്തണമെന്ന നിലപാട് ബിനോയ് വിശ്വം ഇന്നും ആവര്‍ത്തിച്ചു. തിരുത്തണമെന്ന നിലപാട് എസ്എഫ്ഐയെ ശക്തിപ്പെടുത്താനാണെന്നും ബിനോയ് വിശ്വം വ്യക്തമാക്കി.
