മിര്‍സാപൂര്‍(ഉത്തര്‍പ്രദേശ്): കൈലാസ് മാനസരോവര്‍ ഭാരതത്തിന്റേതാണെന്നും അത് രാഷ്‌ട്രത്തോട് ചേര്‍ക്കണമെന്നും വിന്ധ്യാചല മഹുവാരിയിലെ ദേവരാഹ ഹന്‍സ് ബാബ. സംഘടിത ശക്തി കൊണ്ട് ഭാരതത്തെ ഒറ്റക്കെട്ടാക്കുന്ന പ്രവര്‍ത്തനം ആര്‍എസ്എസിന് പൂര്‍ത്തിയാക്കാനാവുമെന്ന് അദ്ദേഹം പറഞ്ഞു. ആശ്രമം സന്ദര്‍ശിച്ച ആര്‍എസ്എസ് സര്‍സംഘചാലക് ഡോ. മോഹന്‍ ഭാഗവതുമായി സംസാരിക്കുകയായിരുന്നു അദ്ദേഹം.
ഭായ് ഭായ് എന്ന് പറഞ്ഞ് രാജ്യത്തെ ചതിക്കുകയും ആക്രമിക്കുകയും ചെയ്തവര്‍ക്ക് അതിന്റെ ഫലം ലഭിക്കുക തന്നെ ചെയ്യും. ഭഗവാന്‍ ശങ്കരന്റെ അനുഗ്രഹത്താല്‍ കൈലാസ് മാനസരോവര്‍ നമ്മളിലേക്കെത്തും. അതിനുള്ള സാഹചര്യങ്ങളാണ് ലോകക്രമത്തില്‍ ഉരുത്തിരിഞ്ഞുവരുന്നത്.
ഇന്നും മാനസരോവറിന് ചുറ്റുമുള്ള ഗുഹകളില്‍ ത്രികാലജ്ഞരായ ഋഷീശ്വരന്മാര്‍ ഈ പ്രാര്‍ത്ഥനയോടെ കഴിയുന്നു. അതിന് ഫലമുണ്ടാകും. ഭാരതം ലോകത്തിന്റെയാകെ നേതാവാണെന്നതിന്റെ തെളിവുകള്‍ വേഗത്തില്‍ അനുഭവത്തിലെത്തുമെന്ന് അദ്ദേഹം സര്‍സംഘചാലകിനോട് പറഞ്ഞു.
രണ്ട് ദിവസത്തെ സന്ദര്‍ശനത്തിനായി വിന്ധ്യാചല ഭൂമിയിലെത്തിയ സര്‍സംഘചാലക് ആദിശക്തി മാ വിന്ധ്യവാസിനി ക്ഷേത്രത്തില്‍ ദര്‍ശനം നടത്തി. തുടര്‍ന്ന് കൈലാസ് മാനസരോവര്‍ സംയോജനത്തിനായി മഹുവാരി ദേവരാഹ ആശ്രമത്തില്‍ നടന്ന ഹവനപൂജയില്‍ പങ്കുചേര്‍ന്നു. ആശ്രമപരിസരത്ത് വൃക്ഷത്തൈകള്‍ നട്ടതിന് ശേഷമാണ് സര്‍സംഘചാലക് മടങ്ങിയത്.
