ബിഗ് ബോസ് ഗ്രാൻഡ് ഫിനാലെ വേദിയ്ക്ക് നിറപ്പകിട്ടേകാൻ അവതാരകനായ മോഹൻലാലിനൊപ്പം മമ്മൂട്ടിയും വേദിയിലെത്തുമെന്നാണ് പുറത്തുവരുന്ന റിപ്പോർട്ട്
മൂന്നുമാസമായി മലയാളികളുടെ സ്വീകരണമുറികളെ ആവേശത്തിലാക്കി വിജയകരമായി സംപ്രേഷണം ചെയ്തുവരുന്ന ബിഗ് ബോസ് മലയാളം സീസൺ 6 ഇന്ന് പരിസമാപ്കിയിലേക്ക്. വ്യക്തമായ നിലപാടുകൾ അറിയിച്ചും ഗെയിമുകൾ ആസൂത്രണം ചെയ്തും വ്യക്തിത്വം കാത്തുസൂക്ഷിച്ചും ടാസ്കുകളിൽ കഴിവുതെളിയിച്ചും 100 ദിവസം ബിഗ് ബോസ് വീട്ടിലെ മത്സരം അതിജീവിച്ച അന്തിമവിജയി ആരെന്ന് ഇന്ന് പ്രഖ്യാപിക്കപ്പെടും. വൈകിട്ട് ഏഴു മണി മുതലാണ് ഗ്രാൻഡ് ഫിനാലെയുടെ തത്സമയസംപ്രേക്ഷണം.
ജൂൺ 16 ഞായറാഴ്ചയാണ് ഗ്രാൻഡ് ഫിനാലെ. ജിൻ്റോ, ജാസ്മിൻ ജാഫർ, അർജുൻ ശ്യാം, അഭിഷേക് ശ്രീകുമാർ, ഋഷി കുമാർ എന്നിവരാണ് അവസാനഘട്ടം ഏറ്റുമുട്ടുന്ന മത്സരാർത്ഥികൾ. ഇവരിൽ നിന്നും ആരാവും ബിഗ് ബോസ് കിരീടം ചൂടുക എന്നറിയാനാണ് പ്രേക്ഷകർ ആകാംക്ഷയോടെ കാത്തിരിക്കുന്നത്.
ഗ്രാൻഡ് ഫിനാലെ വേദിയ്ക്ക് നിറപ്പകിട്ടേകാൻ അവതാരകനായ മോഹൻലാലിനൊപ്പം ഇത്തവണ മമ്മൂട്ടിയും വേദിയിലെത്തുമെന്ന് അഭ്യൂഹങ്ങളുണ്ട്. അതേസമയം, ചാനൽ അധികൃതരോ ബിഗ് ബോസ് അണിയറപ്രവർത്തകരോ ഇക്കാര്യം സ്ഥിരീകരിച്ചിട്ടില്ല.
പ്രശസ്ത താരങ്ങളും മുൻ ബിഗ് ബോസ്സ് മത്സരാർത്ഥികളുമായ നോബി, കുട്ടി അഖിൽ, സൂരജ് , നാദിറ, റനീഷ തുടങ്ങിയവർ അവതരിപ്പിക്കുന്ന കോമഡി സ്കിറ്റും ചലച്ചിത്രപിന്നണി ഗായകരായ സിതാര, വിധു പ്രതാപ്, ശക്തിശ്രീ എന്നിവർ ഒരുക്കുന്ന സംഗീതവിരുന്നും പ്രശസ്ത താരങ്ങളായ നീത പിള്ള , ദിൽഷാ പ്രസന്നൻ, ശ്രുതിലക്ഷ്മി, ധന്യ മേരി വർഗീസ്, ജാഫർ സാദിഖ് തുടങ്ങിയവരുടെ നൃത്യവിസ്മയങ്ങളും ഗ്രാൻഡ് ഫിനാലെയിൽ ഉൾപ്പെടുത്തിയിട്ടുണ്ട്.
