മുംബൈ: ഭാരത ക്രിക്കറ്റ് താരം കേദാര് ജാദവ് സജീവ ക്രിക്കറ്റില് നിന്ന് വിരമിച്ചു. മുന് നായകന് എം.എസ്. ധോണിയുടെ വഴി പിന്തുടര്ന്ന് അതേ വാക്കുകള് പകര്ത്തി സോഷ്യല് മീഡിയയിലൂടെയാണ് ജാദവ് വിരമിക്കല് പ്രഖ്യാപിച്ചത്.
കിഷോര്കുമാറിന്റെ ഗാന പശ്ചാത്തലത്തിലുള്ള ഇന്സ്റ്റഗ്രാം പോസ്റ്റിലൂടെയാണ് 39കാരനായ കേദാര് ജാദവ് വിരമിക്കല് പ്രഖ്യാപിച്ചത്. ആയിരത്തി അഞ്ഞൂറ് മണിക്കൂര് നീണ്ട കരിയറിലുടനീളം നിങ്ങള് നല്കിയ സ്നേഹത്തിനും പിന്തുണയ്ക്കും നന്ദി. ക്രിക്കറ്റിന്റെ എല്ലാ ഫോര്മാറ്റില് നിന്നും വിരമിച്ചതായി പ്രഖ്യാപിക്കുന്നു എന്നായിരുന്നു ഇന്സ്റ്റഗ്രാമിലെ പോസ്റ്റില് കേദാര് ജാദവ് വ്യക്തമാക്കിയത്.
2014-2020 കാലയളവില് ഭാരതത്തിനായി 73 ഏകദിനങ്ങളിലും ഒമ്പത് ടി20 മത്സരങ്ങളിലും കളിച്ചിട്ടുള്ള കേദാര് ജാദവ് 2019ലെ ഏകദിന ലോകകപ്പിലും കളിച്ചു. 73 ഏകദിനങ്ങളിലും 9 ടി 20കളിലും കേദാര് ഭാരതത്തിനായി കളിച്ചു. ഏകദിനത്തില് രണ്ട് സെഞ്ചുറിയും ആറ് അര്ദ്ധസെഞ്ചുറിയുമടക്കം 1389 റണ്സും ടി 20യില് 122 റണ്സും നേടി. ഏകദിനങ്ങളില് 27 വിക്കറ്റും സ്വന്തമാക്കി.
