പാട് ന : ബിഹാറിലെ നളന്ദയില്‍ ജനതാദള്‍ (യു) പോളിംഗ് ഏജന്റായിരുന്ന അനില്‍ കുമാര്‍ (62) കൊല്ലപ്പെട്ടു. കൊലപാതകത്തിനു പിന്നില്‍ ആര്‍ജെഡിയാണെന്നു നളന്ദ ലോക്‌സഭാ മണ്ഡലത്തിലെ ജെഡിയു സ്ഥാനാര്‍ഥി കൗശലേന്ദ്ര കുമാര്‍ ആരോപിച്ചു. അനില്‍ കുമാറിന്റെ കുടുംബാംഗങ്ങളും ഇതേ ആരോപണമാണ് ഉന്നയിച്ചത്.
അനില്‍ കുമാറിനെ തിങ്കളാഴ്ച പുലര്‍ച്ചെ വീടിനു സമീപത്തെ പാടത്ത് മര്‍ദ്ദനമേറ്റ് പരിക്കുകളോടെ കണ്ടെത്തുകയായിരുന്നു.പുലര്‍ച്ചെ അനില്‍കുമാര്‍ പാടത്തേക്ക് പോയതാണെന്നു വീട്ടുകാര്‍ വെളിപ്പെടുത്തി.
ആശുപത്രിയില്‍ എത്തിച്ചെങ്കിലും ഫലമുണ്ടായില്ല. അനില്‍ കുമാറിന്റെ ജീവന് ആര്‍ജെഡിയില്‍ നിന്ന് ഭീഷണിയുണ്ടായിരുന്നതായി കൗശലേന്ദ്ര കുമാര്‍ പറഞ്ഞു. ജൂണ്‍ ഒന്നിനായിരുന്നു നളന്ദ മണ്ഡലത്തില്‍ വോട്ടെടുപ്പ്.
