തിരുവനന്തപുരം: രഞ്ജിത്ത് വധക്കേസ് അട്ടിമറിക്കാന് സിപിഎം ആസൂത്രിതമായി നടത്തിയ നീക്കങ്ങളെല്ലാം പൊളിച്ചടുക്കി. വിചാരണ നടപടികളുടെ ഇടയില് ഭരണസ്വാധീനം ഉപയോഗിച്ച് സാക്ഷികളെ ഭീഷണിപ്പെടുത്താനും സ്വാധീനിക്കുവാനും സിപിഎം ശ്രമിച്ചിരുന്നു. കേസില് സ്പെഷ്യല് പ്രോസിക്യൂട്ടറായി ഒരു സീനിയര് ക്രിമിനല് അഭിഭാഷകനെ നിയമിക്കണമെന്ന് ആവശ്യപ്പെട്ട് രഞ്ജിത്തിന്റെ അമ്മ മോളി രാജന് ആവശ്യപ്പെട്ടെങ്കിലും ആവശ്യം സര്ക്കാര് അവഗണിച്ചു. തുടര്ന്ന് ഹൈക്കോടതിയെ സമീപിച്ചതോടെയാണ് അഡ്വ. പ്രതാപ് ജി പടിക്കലിനെ കേസില് സ്പെഷ്യല് പ്രോസിക്യൂട്ടറായി നിയമിച്ചത്.
നിഷ്പക്ഷമായ വിചാരണ നടപടികള്ക്ക് പ്രതികളുടെ ഭാഗത്തു നിന്നും തടസമുണ്ടാകുന്നു എന്ന് കാണിച്ചുകൊണ്ട് ഹൈക്കോടതിയെ സമീപിച്ചതിനെത്തുടര്ന്ന് വിറ്റ്നസ് പ്രൊട്ടക്ഷന് സ്കീം അനുസരിച്ചുള്ള നടപടികള് കേസില് സ്വീകരിക്കാനും കോടതി ഉത്തരവിട്ടിരുന്നു.
കേസില് പ്രോസിക്യൂഷന് ഭാഗത്തു നിന്നും 41 സാക്ഷികളെ വിസ്തരിച്ചിരുന്നു. എന്നാല്, വിചാരണ വേളയില് നിലവില് കേരള പോലിസില് ജോലി നോക്കി വരുന്ന സാക്ഷി ഉള്പ്പെടെയുള്ള ചില സാക്ഷികള് കൂറുമാറി പ്രതിഭാഗം ചേര്ന്നത് വെല്ലുവിളിയായി. എങ്കില്ക്കൂടി കുറ്റകൃത്യം തെളിയിക്കാനുള്ള കൃത്യമായ സാക്ഷിമൊഴികളും തൊണ്ടി സാധനങ്ങളും രേഖകളും കോടതിയില് ഹാജരാക്കാന് പ്രോസിക്യൂഷന് സാധിച്ചിരുന്നു.
തെളിവെടുപ്പ് പൂര്ത്തിയായിക്കഴിഞ്ഞ ശേഷം പ്രതികളുടെ ഓരോരുത്തരുടെയും കുറ്റകൃത്യത്തിലെ പങ്ക് വ്യക്തമാക്കി കൊണ്ട് ആഴ്ചകളോളം നീണ്ട സുദീര്ഘമായ അന്തിമവാദമാണ് കേസില് സ്പെഷ്യല് പ്രോസിക്യൂട്ടര് അഡ്വ. പ്രതാപ് ജി പടിക്കല് നടത്തിയത്. അതു കൊണ്ടു തന്നെ രജ്ഞിത്തിന്റെ കൊലയാളികള്ക്ക് അര്ഹമായ ശിക്ഷ ലഭിക്കുമെന്ന പ്രതീക്ഷയിലാണ് രജ്ഞിത്തിന്റെ കുടുംബവും സുഹൃത്തുക്കളും കഴിയുന്നത്.


















