കന്യാകുമാരി : വിവേകാനന്ദപ്പാറയിലെ 45 മണിക്കൂര്‍ ധ്യാനം പൂര്‍ത്തിയാക്കി പ്രധാനമന്ത്രി നരേന്ദ്രമോദി ന്യൂദല്‍ഹിയിലേക്ക് മടങ്ങി. ധ്യാനം പൂര്‍ത്തിയാക്കി തിരുവള്ളുവരുടെ പ്രതിമയില്‍ ആദരമര്‍പ്പിച്ച ശേഷം ബോട്ടില്‍ കരയിലെത്തി ഹെലികോപ്റ്ററില്‍ തിരുവനന്തപുരത്തേക്ക് പോവുകയായിരുന്നു നരേന്ദ്രമോദി.
രണ്ട് ഹെലികോപ്റ്ററുകളുടെ അകമ്പടിയോടെ കന്യാകുമാരി ഹെലിപാഡില്‍ നിന്ന് പറന്നുയര്‍ന്ന ഹെലികോപ്റ്റര്‍ ഉച്ചയ്‌ക്ക് ശേഷം 3.55ന് തിരുവനന്തപുരം വിമാനത്താവളത്തില്‍ ഇറങ്ങി. പത്ത് മിനിട്ടിനകം പ്രത്യേക വിമാനത്തില്‍ ന്യൂദല്‍ഹിയിലേക്ക് മടങ്ങി.
ആദ്യ ദിവസം വിവേകാനന്ദ പ്രതിമയില്‍ പുഷ്പാര്‍ച്ചന നടത്തിയ പ്രധാനമന്ത്രി ശ്രീരാമകൃഷ്ണ പരമഹംസരുടെയും ശാരദാദേവിയുടെയും ചിത്രത്തിന് മുന്നില്‍ ആദരമര്‍പ്പിച്ചാണ് ധ്യാനം ആരംഭിച്ചത്. തെരഞ്ഞെടുപ്പ് പ്രചാരണം അവസാനിച്ചതിന് ശേഷമാണ് മോദി വിവേകാനന്ദപ്പാറയില്‍ ധ്യാനമിരിക്കാനെത്തിയത്.
