ന്യൂദല്ഹി: സന്ദേശ്ഖാലിയില് ഇ ഡി സംഘത്തിന് നേരെയുണ്ടായ ആക്രമണത്തില് ഷാജഹാന് ഷെയ്ഖുള്പ്പെടെ ആറുപേര്ക്ക് സിബിഐ കുറ്റപത്രം നല്കി. നൂറിലധികം പേജുള്ള കുറ്റപത്രത്തില് ഷാജഹാന് ഷെയ്ഖ്, സഹോദരന് ആലംഗീര്, ഷിബു ഹസ്ര, ദീദാര് ബക്ഷ് തുടങ്ങി ആറുപേര്ക്കെതിരെയാണ് കുറ്റപത്രം.
കലാപമുണ്ടാക്കുക, ഭീഷണിപ്പെടുത്തുക തുടങ്ങിയ കുറ്റങ്ങളാണ് ഇവര്ക്കെതിരെ ചുമത്തിയിരിക്കുന്നത്. ജനുവരി 5ന് പരിശോധനയ്ക്കെത്തിയ ഇ ഡി ഉദ്യോഗസ്ഥരെ തൃണമൂല് പ്രവര്ത്തകര് മര്ദിച്ചത് മുതല് സന്ദേശ്ഖാലി സംഘര്ഷഭരിതമാണ്. ബംഗാളില് റേഷന് കുംഭകോണവുമായി ബന്ധപ്പെട്ട് ഷെയ്ഖിന്റെ വീട്ടില് പരിശോധനയ്ക്കെത്തിയ ഉദ്യോഗസ്ഥരെയാണ് തൃണമൂല് പ്രവര്ത്തകര് ആക്രമിച്ചത്.
ജനുവരി അഞ്ചിന് നടന്ന സംഭവങ്ങളുമായി ബന്ധപ്പെട്ട് മൂന്ന് കേസുകളാണ് സിബിഐ അന്വേഷിക്കുന്നത്. കേസില് ഫെബ്രുവരി 29ന് ഷാജഹാന് ഷെയ്ഖിനെ പോലീസ് അറസ്റ്റ് ചെയ്തു. ഷാജഹാനും അനുയായികളും തങ്ങളുടെ ഭൂമി തട്ടിയെടുക്കുന്നുവെന്നും ലൈംഗികാതിക്രമം നടത്തുന്നുവെന്നും കാട്ടി പ്രദേശത്തെ സ്ത്രീകള് പ്രതിഷേധവുമായി രംഗത്ത് വന്നിരുന്നു
