കോട്ടയം: ജില്ലയിലെ വിനോദ സഞ്ചാരകേന്ദ്രങ്ങളില് പ്രവേശനത്തിന് നിരോധനം.കോട്ടയം ജില്ലയില് മഴ ശക്തമായി തുടരുന്നതും വരും ദിവസങ്ങളില് മഴ രൂക്ഷമാകുമെന്ന മുന്നറിയിപ്പുകള് ഉളളതിനാലുമാണ് ഇലവീഴാപൂഞ്ചിറ,ഇല്ലിക്കല്കല്ല്, മാര്മല അരുവി തുടങ്ങിയ വിനോദസഞ്ചാര കേന്ദ്രങ്ങളിലേക്കുള്ള പ്രവേശനവും ഈരാറ്റുപേട്ട വാഗമണ് റോഡിലെ രാത്രികാലയാത്രയും നിരോധിച്ചത്. ജില്ലാ കളക്ടര് വി. വിഗ്നേശ്വരിയാണ് ഉത്തരവ് പുറപ്പെടുവിച്ചത്.
മീനച്ചിലാറിന്റെ തീര പ്രദേശത്ത് ജാഗ്രതാ നിര്ദ്ദേശം പുറപ്പെടുവിച്ചു.ഇടുക്കിയിലെ മലയോര മേഖലകളില് രാത്രി യാത്ര നിരോധിച്ചു. രാത്രി ഏഴ് മണി മുതല് രാവിലെ ആറ് മണി വരെയാണ് യാത്ര നിരോധിച്ചത്.
അതേസമയം ചുവപ്പ് ജാഗ്രത പ്രഖ്യാപിച്ച കോട്ടയം, എറണാകുളം ജില്ലകളില് ഒറ്റപ്പെട്ട അതിതീവ്ര മഴയാണ് കാലാവസ്ഥ വകുപ്പ് പ്രവചിക്കുന്നത്. പത്തനംതിട്ട, ആലപ്പുഴ, ഇടുക്കി ജില്ലകളില് ഇന്ന് ഓറഞ്ച് ജാഗ്രതയാണ്. ഇവിടങ്ങളില് ഒറ്റപ്പെട്ട അതിശക്തമായ മഴയ്ക്കാണ് സാധ്യത.
തിരുവനന്തപുരം, കൊല്ലം, തൃശൂര്, പാലക്കാട്, മലപ്പുറം, കോഴിക്കോട് ജില്ലകളില് ഇന്ന് മഞ്ഞ ജാഗ്രതയാണ്.നാളെ പത്തനംതിട്ട ആലപ്പുഴ കോട്ടയം എറണാകുളം ജില്ലകളില് കേന്ദ്ര കാലാവസ്ഥ വകുപ്പ് ഓറഞ്ച് ജാഗ്രതയും തിരുവനന്തപുരം കൊല്ലം ഇടുക്കി തൃശൂര് ജില്ലകളില് മഞ്ഞ ജാഗ്രതയും പ്രഖ്യാപിച്ചു. മണ്ണിടിച്ചില്, മലവെള്ളപ്പാച്ചില്, ഉരുള്പൊട്ടല് തുടങ്ങിയ അപകടങ്ങള്ക്ക് സാധ്യതയുള്ള മേഖലകളില് നിന്ന് ആളുകള് മാറി താമസിക്കണം. അടുത്ത മൂന്നോ നാലോ ദിവസത്തിനുള്ളില് കാലവര്ഷം കേരളത്തില് എത്തിയേക്കും എന്നാണ് കേന്ദ്ര കാലാവസ്ഥ വകുപ്പിന്റെ പ്രവചനം.
കേരള തീരത്ത് ഇന്ന് രാത്രി 11.30 വരെ ശക്തമായ തിരമാലയ്ക്കും കടലാക്രമണത്തിനും സാധ്യതയുണ്ടെന്ന് ദേശീയ സമുദ്ര സ്ഥിതി പഠന ഗവേഷണ കേന്ദ്രം അറിയിച്ചു. കാലാവസ്ഥ മോശമായതിനാല് കേരള ലക്ഷദ്വീപ് തീരങ്ങളില് നിന്നുള്ള മത്സ്യബന്ധനത്തിന് വിലക്കേര്പ്പെടുത്തി.
