മണ്ണാര്ക്കാട്: പേവിഷ ബാധയേറ്റ് ചികിത്സയിലായിരുന്ന ഹോമിയോ ഡോക്ടര് മരിച്ചു. പാലക്കാട് കുമരംപുത്തൂരില് പള്ളിക്കുന്ന് ചേരിങ്ങല് റംലത്താണ് (42) മരിച്ചത്.
രണ്ടുമാസം മുമ്പ് വീട്ടിലെ വളര്ത്തുനായയുടെ നഖം തട്ടി മുറിവേറ്റിരുന്നെങ്കിലും ചികിത്സ തേടിയിരുന്നില്ല. ദിവസങ്ങള്ക്കകം നായ ചാവുകയും ചെയ്തു. അസ്വസ്ഥത ഉണ്ടായതിനെ തുടര്ന്ന് ഞായറാഴ്ച മണ്ണാര്ക്കാട് സ്വകാര്യ ആശുപത്രികള്, കോട്ടത്തറ ആശുപത്രി എന്നിവിടങ്ങളിലെ ചികിത്സയ്ക്ക് ശേഷം തൃശ്ശൂര് മെഡിക്കല് കോളജിലേക്ക് മാറ്റുകയായിരുന്നു. ഇവിടെ നിരീക്ഷണത്തിലിരിക്കെ ഇന്നലെ പുലര്ച്ച മെഡിക്കല് കോളജ് അധികൃതരുടെ അനുമതിയില്ലാതെ വീട്ടിലേക്ക് മടങ്ങിയെത്തി. താമസിയാതെ അസ്വസ്ഥതയുണ്ടാവുകയും ഉച്ചയോടെ വീട്ടില് തന്നെ മരിക്കുകയും ചെയ്തു. പേ വിഷബാധ മൂലമാണ് മരണമെന്ന് ആരോഗ്യവകുപ്പ് സ്ഥിരീകരിച്ചു.
മൃതദേഹം ബന്ധുക്കള്ക്ക് വിട്ടുനല്കുമെന്ന് മണ്ണാര്ക്കാട് താലൂക്ക് ആശുപത്രി സൂപ്രണ്ട് അറിയിച്ചു. ഇവരുമായി ഇടപഴകിയവരോട് കുത്തിവയ്പ്പെടുക്കാനും നിര്ദേശിച്ചിട്ടുണ്ട്.
