ബോളിവുഡ് പ്രേക്ഷകരുടെ പ്രിയ താരമാണ് ജാൻവി കപൂർ. താരത്തിന്റെ ഏറ്റവും പുതിയ ചിത്രം ‘മിസ്റ്റര് ആന്ഡ് മിസിസ് മഹി’ റിലീസിനോടടുക്കുകയാണ്. രാജ്കുമാർ റാവുവും ചിത്രത്തിൽ ജാൻവിക്കൊപ്പം പ്രധാന വേഷത്തിലെത്തുന്നുണ്ട്. ക്രിക്കറ്റ് പ്രമേയമാവുന്ന ചിത്രം മെയ് 21 നാണ് തിയേറ്ററുകളിൽ എത്തുന്നത്.
2018-ൽ പുറത്തിറങ്ങിയ ‘ദഡക്ക്’ എന്ന ചിത്രത്തിലൂടെയാണ് താരപുത്രി സിനിമയിൽ അരങ്ങേറ്റം കുറിക്കുന്നത്. പിന്നീട് ഗോസ്റ്റ് സ്റ്റോറീസ്, റൂഹി, മിലി തുടങ്ങീ നിരവധി ചിത്രങ്ങളിലൂടെ ശ്രദ്ധേയപ്രകടനമാണ് താരം കാഴ്ചവെച്ചത്.
ഇപ്പോഴിതാ തന്റെ വായനകളെ കുറിച്ചും ഗാന്ധി- ഡോ. അംബേദ്കർ സംവാദങ്ങളെ കുറിച്ചുമുള്ള തന്റെ നിലപാടിനെ കുറിച്ചും സംസാരിക്കുകയാണ് ജാൻവി കപൂർ. ചരിത്രത്തിന്റെ ഏത് ഘട്ടമാണ് താല്പര്യമെന്ന അവതാരകന്റെ ചോദ്യത്തിന് മറുപടി പറയവെയാണ് ജാൻവി ഗാന്ധിയെ കുറിച്ചും ഡോ. അംബേദ്കറെ കുറിച്ചും പരാമർശിച്ചത്.
സത്യം പറയണോ? ഇതിന് മറുപടി നൽകിയാൽ നിങ്ങൾ കൂടുതൽ കാര്യങ്ങൾ ചോദിക്കില്ല. എന്റെ കാഴ്ചപ്പാടുകൾ എങ്ങനെ പ്രേക്ഷകരിലേക്ക് എത്തുമെന്ന് എനിക്കറിയില്ല. എന്നാൽ അംബേദ്കറിനും ഗാന്ധിക്കുമിടയിൽ നടന്ന സംവാദങ്ങൾ വീക്ഷിക്കുന്നത് അങ്ങേയറ്റം താത്പര്യജനകമായിരുന്നു. അത് നമ്മുടെ സമൂഹത്തെ വലിയ രീതിയിൽ സ്വാധീനിച്ചിട്ടുണ്ട്. തൊട്ടുകൂടായ്മ, ജാതി തുടങ്ങിയ വിഷയങ്ങളിൽ ഇരുവരുടെയും വീക്ഷണങ്ങൾ ഭിന്നമാണ്.
അത് നമ്മുടെ സമൂഹത്തെ വലിയ രീതിയിൽ സ്വാധീനിച്ചിട്ടുമുണ്ട്.
തുടക്കം മുതൽ തന്നെ ഇക്കാര്യങ്ങളിൽ അംബേദ്കറുടെ നിലപാടുകൾ വ്യക്തവും ശക്തവുമാണ്. ഗാന്ധിയുടെ വീക്ഷണങ്ങൾക്ക് പരിണാമങ്ങൾ ഉണ്ടാകുന്നുണ്ട്. നമ്മുടെ സമൂഹത്തിൽ ജാതിയുടെ പ്രശ്നങ്ങളുണ്ട്. അതേക്കുറിച്ച് മൂന്നാമതൊരാളിൽനിന്ന് അറിയുന്നതും അതിൽ ജീവിക്കുന്ന ഒരാളിൽനിന്ന് മനസ്സിലാക്കുന്നതും തമ്മിൽ വലിയ വ്യത്യാസമുണ്ട്.” എന്നാണ് ജാൻവി പറഞ്ഞത്.
