കോട്ടയം: ക്ഷേത്രത്തില്‍ പൂജിക്കാന്‍ നല്‍കിയ നവരത്ന മോതിരം പണയം വച്ച മേല്‍ശാന്തിക്ക് സസ്പന്‍ഷന്‍. തിരുവിതാംകൂര്‍ ദേവസ്വം ബോര്‍ഡിനു കീഴിലെ തിരുമൂഴിക്കുളം ദേവസ്വത്തിലെ ക്ഷേത്ര മേല്‍ശാന്തി കെ പി വിനീഷിനാണ് സസ്പന്‍ഷന്‍.
പ്രവാസി മലയാളി കുടുംബം പൂജിച്ചു നല്‍കാന്‍ ഏല്‍പിച്ച ഒന്നര ലക്ഷം രൂപ വിലവരുന്ന നവരത്നമോതിരമാണ് സ്വകാര്യ ധനകാര്യ സ്ഥാപനത്തില്‍ മേല്‍ശാന്തി പണയം വച്ചത്.
ദുബായില്‍ കഴിയുന്ന പറവൂര്‍ സ്വദേശിയും കുടുംബവുമാണ് മോതിരം മേല്‍ശാന്തിയെ ഏല്‍പിച്ചത്. എന്നാല്‍, 21 ദിവസത്തെ പൂജ ചെയ്താല്‍ കൂടുതല്‍ നല്ലതാണെന്നു വിശ്വസിപ്പിച്ചു മോതിരം വാങ്ങിയ ശേഷം തിരിച്ചു നല്‍കിയത് പൂജകളുടെ പൂവും ചന്ദനവും മാത്രമാണ്. മോതിരം കൈമോശം വന്നെന്നാണു മേല്‍ശാന്തി കുടുംബത്തെ അറിയിച്ചത്. പ്രവാസിയും കുടുംബവും ദേവസ്വം കമ്മിഷണര്‍ക്കു നല്‍കിയ പരാതിയെ തുടര്‍ന്ന് നടത്തിയ അന്വേഷണത്തില്‍ മോതിരം പണയം വച്ചെന്നു മേല്‍ശാന്തി സമ്മതിച്ചു. അന്വേഷണത്തിനിടെ മേല്‍ശാന്തി മോതിരം തിരികെ നല്‍കി.
എന്നാല്‍ വിജിലന്‍സ് അന്വേഷണ റിപ്പോര്‍ട്ടിന്റെ അടിസ്ഥാനത്തില്‍ ദേവസ്വം കമ്മിഷണറുടെ ഉത്തരവു പ്രകാരം മേല്‍ശാന്തിയെ സസ്പെന്‍ഡ് ചെയ്യുകയായിരുന്നു. മോതിരം രസീത് എഴുതി വഴിപാടായി ക്ഷേത്രത്തില്‍ ഏല്‍പിച്ചതല്ലെന്നും മേല്‍ശാന്തിയുമായി വഴിപാടുകാര്‍ നേരിട്ട് ഇടപാട് നടത്തുകയായിരുന്നുവെന്ന് ദേവസ്വം അധികൃതര്‍ പറഞ്ഞതെന്ന് അന്വേഷണ ഉദ്യോഗസ്ഥനായ വിജിലന്‍സ് എസ്ഐ പറഞ്ഞു.
