കൊച്ചി :ബാറുടമകളില് നിന്ന് കോടികള് പിരിച്ചെടുത്ത് അഴിമതി നടത്താന് നീക്കം നടക്കുന്നുവെന്ന് പ്രതിപക്ഷ നേതാവ് വി ഡി സതീശന്. ബാര് കോഴ ആരോപണവുമായി ബന്ധപ്പെട്ട് പുറത്ത് വന്നത് ഞെട്ടിപ്പിക്കുന്ന വിവരമാണെന്നും അദ്ദേഹം പറഞ്ഞു.
അബ്കാരി ചട്ടം ഭേദഗതി വരുത്താമെന്ന ഉറപ്പിലാണ് പണപ്പിരിവെന്നും വി ഡി സതീശന് പറഞ്ഞു. രണ്ടാം പിണറായി സര്ക്കാര് 130 ബാറിന് അനുമതി നല്കി. ബാറിന്റെ എണ്ണം കൂടി. എന്നാല് ടേണ് ഓവര് ടാക്സ് കുറയുന്നു. ബാറുകളില് പരിശോധന നടക്കുന്നില്ല. മദ്യവര്ജനത്തിന് മുന്നില് നില്ക്കുമെന്ന എല് ഡി ഫിന്റെ ഉറപ്പ് പ്രഹസനമായെന്നും എക്സൈസ് മന്ത്രി എം ബി രാജേഷ് രാജി വെയ്ക്കണമെന്നും പ്രതിപക്ഷ നേതാവ് ആവശ്യപ്പെട്ടു.
നോട്ടെണ്ണുന്ന യന്ത്രം മുഖ്യമന്ത്രിയുടെ വീട്ടിലാണോ എക്സൈസ് മന്ത്രിയുടെ വീട്ടിലാണോയെന്ന് പ്രതിപക്ഷ നേതാവ് പരിഹസിച്ചു.മന്ത്രി മാറി നിന്ന് അന്വേഷണം നടത്തണം.പണപ്പിരിവ് നടക്കുന്നു എന്ന് വ്യക്തമാണ്. പണം കിട്ടിയാല് അനുകൂലമായ മദ്യനയമെന്നതാണ് ഓഫര്. കാലം എല്ഡിഎഫിനോട് കണക്ക് ചോദിക്കുകയാണ്. കെ എം മാണിക്കെതിരെ ഒരു കോടി ആരോപണം ഉന്നയിച്ചവര്ക്ക് എതിരെ 20 കോടിയുടെ ആരോപണമാണ് ഉണ്ടായിരിക്കുന്നതെന്നും വി ഡി സതീശന് പറഞ്ഞു
ഐ ടി പാര്ക്കുകളില് ബാറുകള്ക്ക് അനുമതി നല്കുന്നതുമായി ബന്ധപ്പെട്ട് പ്രതിപക്ഷവുമായി കൂടിയാലോചന നടന്നിട്ടില്ല.പണപ്പിരിവ് നടത്താന് ശബ്ദസന്ദേശം നല്കിയ ബാറുടമകളുടെ സംഘടനാ ഭാരവാഹി അനിമോനെതിരെ ബാറുടമകളുടെ സംഘടനയുടെ നടപടി വെള്ള പൂശാന് മാത്രമാണ്. എക്സൈസ് മന്ത്രി രാജി വെച്ചില്ലെങ്കില് പ്രതിഷേധ പരിപാടികള് സംഘടിപ്പിക്കുമെന്നും വി ഡി സതീശന് കൂട്ടിച്ചേര്ത്തു.
