സുല്ത്താന്പൂര്: രാഹുല് ഗാന്ധിയും പ്രിയങ്കയും ഇനിയും രാഷ്ട്രീയത്തില് ഉരുത്തിരിഞ്ഞിട്ടില്ലെന്നും അതിന് ഇരുവരും ധീരത കാണിക്കണമെന്നും വിമര്ശിച്ച് മേനകാ ഗാന്ധി. രാഹുല് ഗാന്ധിയും പ്രിയങ്കഗാന്ധിയും ഇനിയും ഉരുത്തിരിയേണ്ടിയിരിക്കുന്നുവെന്നും മേനകാഗാന്ധി പറഞ്ഞു. അനുഭവത്തിന്റെ തീച്ചൂളയില് ഉരുത്തിരിയുന്നതിന് പകരം ഇരുവരുെ ഇപ്പോഴും പച്ചക്കുട്ടികളാണെന്ന പരോക്ഷ വിമര്ശനം ഉയര്ത്തുകയായിരുന്നു മേനകാഗാന്ധി.
ഒരു ടിവി അഭിമുഖത്തിലാണ് അവര് ഇക്കാര്യം വ്യക്തമാക്കിയത്. ഇന്ദിരാഗാന്ധിയുടെ മൂത്ത മകന് രാജീവ് ഗാന്ധിയുടെ ഭാര്യയാണ് സോണിയാഗാന്ധി എങ്കില് ഇന്ദിരാഗാന്ധിയുടെ ഇളയമകന് സഞ്ജയ് ഗാന്ധിയുടെ ഭാര്യയാണ് മേനകാഗാന്ധി.സോണിയാഗാന്ധിയുടെ മകനാണ് രാഹുല് ഗാന്ധിയെങ്കില് മേനകാഗാന്ധിയുടെ മകനാണ് വരുണ് ഗാന്ധി. “രാഹുല് ഗാന്ധി കൂടുതല് ധൈര്യം പ്രകടിപ്പിക്കണം. വെറും പദയാത്ര നടത്തിയതുകൊണ്ട് അതിനാവില്ല. അതുകൊണ്ട് ഒരു നേതാവും ഉരുത്തിരിഞ്ഞുവരില്ല. അതിന് കടുത്ത ധീരത പ്രകടിപ്പിക്കുകയാണ് വേണ്ടത്.”- മേനകാഗാന്ധി പറഞ്ഞു.
“രാഹുലിനെക്കുറിച്ച് ഞാന് പറയുന്നത് പ്രിയങ്കയ്ക്കും ബാധകമാണ്. ഇതിനര്ത്ഥം രാഹുല് ഗാന്ധിയെപ്പോലെ പ്രിയങ്കയ്ക്കും രാഷ്ട്രീയത്തില് ഉരുത്തിരിഞ്ഞുവരാന് കഴിഞ്ഞിട്ടില്ല എന്ന് തന്നെയാണ്.”- മേനകാഗാന്ധി പറഞ്ഞു.
