വിഴിഞ്ഞം: വിഴിഞ്ഞം അന്താരാഷ്‌ട്ര തുറമുഖത്ത് സ്റ്റാന്‍ഡ് ബൈ ഡ്യൂട്ടിക്കെത്തുന്ന ഫയര്‍ഫോഴ്‌സ് ജീവനക്കാര്‍ക്ക് പ്രാഥമികാവശ്യങ്ങള്‍ നിര്‍വഹിക്കാന്‍ പോലും സൗകര്യമില്ലെന്ന പരാതിയുമായി ജീവനക്കാര്‍. ഇവിടെ ഡ്യൂട്ടിക്കെത്തുന്ന ജീവനക്കാര്‍ക്ക് ആരോഗ്യ പ്രശ്‌നങ്ങള്‍ നേരിടുന്നതായും, വിശ്രമിക്കാന്‍ സൗകര്യമില്ലെന്നും പരാതിയില്‍ ചൂണ്ടിക്കാട്ടുന്നു. തുറമുഖത്ത് ക്രെയിനുകളുമായി കപ്പലുകള്‍ എത്തുമ്പോള്‍ അഗ്‌നിശമന സേനാ യൂണിറ്റിന്റെ സാന്നിധ്യം ഉണ്ടാവണം.
കപ്പല്‍ എത്തി വാര്‍ഫില്‍ നങ്കൂരമിട്ട് ദൗത്യം പൂര്‍ത്തിയാക്കി മടങ്ങുന്നതുവരെ ഒരു ഫയര്‍എന്‍ജിന്‍ യൂണിറ്റും മതിയായ ഉദ്യോഗസ്ഥരും തുറമുഖത്ത് കാവല്‍ ഉണ്ടാകും. ഇങ്ങനെ രാവും പകലും കാവല്‍ കിടക്കുന്നവര്‍ക്ക് വേണ്ട അടിസ്ഥാന സൗകര്യം ബന്ധപ്പെട്ടവര്‍ ഒരുക്കുന്നില്ലെന്നാണ് പരാതി. നേരത്തെ തുറമുഖത്തേയ്‌ക്ക് ക്രെയിനുകളുമായി എത്തിയ നാല് കപ്പലുകളും മടങ്ങിയപ്പോകുന്നതുവരെ പാഴ്‌വസ്തുക്കള്‍ കൂട്ടിയിടുന്ന ഷെഡിലാണ് വിശ്രമസൗകര്യം ഒരുക്കിയിരുന്നത്.
രാത്രികാലങ്ങളില്‍ ലോറിയില്‍ കൊണ്ടുവരുന്ന സാധനങ്ങള്‍ ഇറക്കുന്നതുവരെ കിടക്കയുമെടുത്ത് മാറി നില്‍ക്കേണ്ട ഗതികേടായിരുന്നുവെന്ന് ജീവനക്കാര്‍ പറയുന്നു. ഇത് കൂടാതെ ചൂടും കൊതുകുകടിയും എലി ശല്യവും വര്‍ദ്ധിച്ചതോടെയാണ് ജീവനക്കാര്‍ പ്രതിഷേധവുമായി രംഗത്തെത്തിയത്. തുടര്‍ന്ന് ഡിപ്പാര്‍ട്ട്‌മെന്റിലെ ഉന്നതര്‍ക്ക് പരാതി നല്‍കി.
ഇതോടെ തുറമുഖ കവാടത്തിന് സമീപത്തെ താല്കാലിക ഷെഡിലെ ഒരു ചെറിയ മുറി ഫയര്‍ യൂണിറ്റിന് വിശ്രമിക്കാനായി ഒരാഴ്ച മുന്‍പ് അനുവദിച്ച് നല്‍കിയെങ്കിലും 24 മണിക്കൂറും ജോലി നോക്കുന്ന ജീവനക്കാര്‍ക്ക് പ്രാഥമിക കര്‍മങ്ങള്‍ നിര്‍വഹിക്കാന്‍ മതിയായ സൗകര്യം ഇപ്പോഴുമായിട്ടില്ല. രാവിലെ ആറ് മുതല്‍ വൈകിട്ട് ആറ് വരെ സമീപത്തെ ഇലക്ട്രിക്കല്‍ സെക്ഷന്‍ ഓഫീസിലെ ബാത്ത്‌റൂം ഉപയോഗിക്കാമെങ്കിലും രാത്രികാലത്ത് ഇവ ഉപയോഗിക്കാനാകില്ല.
പ്രതികരിക്കാൻ ഇവിടെ എഴുതുക: