കൊല്ലം: തങ്ങളുടെ അച്ഛന് ജയിക്കുമെന്നുറപ്പുണ്ടെന്ന് കൊല്ലത്തെ ബിജെപി സ്ഥാനാര്ത്ഥി കൃഷ്ണകുമാറിന്റെ നാല് പെണ്മക്കള്. തെരഞ്ഞെടുപ്പ് പ്രചാരണത്തിന്റെ അവസാനലാപ്പില് കഴിഞ്ഞ ഒരാഴ്ചയായി അവര് അച്ഛനോടൊപ്പമുണ്ട്.
തെരഞ്ഞെടുപ്പ് പ്രാചരണത്തില് ജനങ്ങളുടെ പ്രതികരണം കാണുമ്പോള് അച്ഛന് ജയിക്കുമെന്നുറപ്പുണ്ടെന്ന് മകള് ദിയ പറയുന്നു. സ്ത്രീവോട്ടര്മാരില് നല്ല പ്രതീക്ഷയുണ്ടെന്നും യുവാക്കളിലും അച്ഛനോട് അനുകൂല പ്രതികരണമുണ്ടാകുമെന്നും നടി കൂടിയായ മകള് അഹാന കൃഷ്ണ പറഞ്ഞു. കോളെജില് അച്ഛന് എസ് എഫ് ഐക്കാര്ക്ക് മറുപടി കൊടുക്കുന്ന വീഡിയോ കണ്ട് പല കൂട്ടുകാരും അച്ഛന് നല്ല രീതിയില് സംസാരിച്ചുവെന്ന് പറഞ്ഞതായും അഹാന പറയുന്നു. സിനിമകളിലൂടെ അച്ഛന് സ്ത്രീകള്ക്കിടയില് നല്ല അഭിപ്രായമുണ്ടെന്നും അത് വോട്ടായി മാറുമെന്നും കരുതുന്നു.
കൊല്ലത്ത് വികസനം വേണമെങ്കില് അച്ഛന് വോട്ട് ചെയ്യണമെന്ന് പറയുന്നുണ്ടെന്നും അച്ഛന്റെ വീഡിയോകള് സോഷ്യല്മീഡിയയില് ഷെയര് ചെയ്യുന്നുണ്ടെന്നും ദിയ പറയുന്നു. അച്ഛനുള്ള പ്രവര്ത്തകരുടെയും വോട്ടര്മാരുടെയും സപ്പോര്ട്ട് നല്ലതുപോലെയുണ്ടെന്നും ദിയ പറഞ്ഞു.
സണ്സ്ക്രീന് പോലും ഉപയോഗിക്കാതെയാണ് അച്ഛന് പ്രചാരണം നടത്തുന്നതെന്നും വെയിലുകൊണ്ട് അച്ഛന്റെ ദേഹത്ത് നിറയെ വിറ്റമിന് ഡി ഉണ്ടെന്നും മറ്റൊരു മകള് ഹന്സിക കൃഷ്ണ പറയുന്നു. കൊല്ലത്ത് കിട്ടിയ ജനങ്ങളുടെ സ്വീകരണം കണ്ട് സന്തോഷം തോന്നിയെന്നും ഹന്സിക കൃഷ്ണ പറയുന്നു. അച്ഛന് പല കാര്യങ്ങളും പ്രകടിപ്പിക്കാന് കഴിയുന്നത് നടനെന്ന നിലയേക്കാള് രാഷ്ട്രീയക്കാരന് എന്ന നിലയിലാണെന്നും ഹന്സിക കൃഷ്ണ പറയുന്നു.
അച്ഛന് ജയിക്കുമെന്ന് മനസ് പറയുന്നുവെന്നും രാഷ്ട്രീയക്കാരന് എന്ന നിലയില് അച്ഛന് ഏറെ ചെയ്യാനുണ്ടെന്നും ഇളയ മകള് ഇഷാനികൃഷ്ണ പറയുന്നു.
മൂന്ന് നിയമസഭാ മണ്ഡലങ്ങളില് ഒന്നാം സ്ഥാനത്തും നാലിടങ്ങളില് രണ്ടാം സ്ഥാനത്തും എത്തുമെന്നാണ് കൃഷ്ണകുമാറിന്റെ പ്രതീക്ഷ.വിജയത്തില് കുറഞ്ഞ യാതൊരു പ്രതീക്ഷയും ഇല്ലെന്നാണ് കൃഷ്ണകുമാര് പ്രതികരിക്കുന്നത്. ഒരു ജനകീയ പ്രശ്നം പരിഹരിക്കാന് പ്രധാനമന്ത്രിയുടെ ഓഫീസില് ഫയല് അയച്ചാല് അതിന്റെ ഫലം കിട്ടുന്നതുവരെ പ്രവര്ത്തിക്കുന്ന സ്വഭാവക്കാരനാണ് കിച്ചു (കൃഷ്ണകുമാര്) എന്നത് കൊല്ലത്തെ ജനങ്ങളും അറിയണമെന്നും ഭാര്യ സിന്ധുകൃഷ്ണ പറയുന്നു.
