കാസര്കോട്: ജനാധിപത്യത്തിന് കരുത്തുപകരാന് 111ാം വയസ്സിലും വോട്ട് ചെയ്ത് കാസര്ഗോഡ് വെള്ളിക്കോത്തെ കുപ്പച്ചി അമ്മ. കാഞ്ഞങ്ങാട് നിയമസഭാ മണ്ഡലത്തിലെ പാര്ട്ട് 20ലെ 486ാം സീരിയല് നമ്പര് വോട്ടറാണ് സി.കുപ്പച്ചി. തെരഞ്ഞെടുപ്പ് കമ്മീഷന്റെ മാര്ഗനിര്ദ്ദേശ പ്രകാരം വീട്ടില് വോട്ട് പ്രക്രിയയുടെ ഭാഗമായി പോളിംഗ് ഉദ്യോഗസ്ഥര് വെള്ളിക്കോത്ത് അടാട്ട് കൂലോത്തു വളപ്പിലെ സി.കുപ്പച്ചിയുടെ വീട്ടിലെത്തിയാണ് വോട്ട് രേഖപ്പെടുത്താന് സൗകര്യമൊരുക്കിയത്.
ലോക്സഭാ മണ്ഡലം വരണാധികാരിയും ജില്ലാ തെരഞ്ഞെടുപ്പ് ഉദ്യോഗസ്ഥനുമായ ജില്ലാ കളക്ടര് കെ.ഇമ്പശേഖറിന്റെ സാന്നിധ്യത്തില് ഇതോടെ വീട്ടിലെ വോട്ട് രേഖപ്പെടുത്തുന്നതിന് കാസര്കോട് ലോക്സഭാ മണ്ഡലത്തില് തുടക്കമായി. മറ്റ് നിയമസഭാ മണ്ഡലങ്ങളിലും വീട്ടിലെ വോട്ട് ആരംഭിച്ചു. ഒന്നാം പോളിംഗ് ഉദ്യോഗസ്ഥന് കൃഷ്ണനായിക് പേര് വിളിച്ചു. തിരിച്ചറിയല് രേഖ പരിശോധിച്ചു. രണ്ടാം പോളിംഗ് ഉദ്യോഗസ്ഥന് സുബിന് രാജ് ചൂണ്ടുവിരലില് മഷിപുരട്ടി. പിന്നെ കുപ്പച്ചിയമ്മ വിരലടയാളം രേഖപ്പെടുത്തി. വീട്ടില് സജ്ജമാക്കിയ താത്കാലിക വോട്ടിംഗ് കമ്പാര്ട്ട്മെന്റില് വോട്ട് രേഖപ്പെടുത്തി. മകന്റെ മരുമകള് ബേബിയുടെ സഹായത്തോടെയാണ് ഇത്തവണ കുപ്പച്ചി വോട്ട് ചെയ്തത്. വോട്ട് രേഖപ്പെടുത്തിയ ബാലറ്റ് പേപ്പര് ഇട്ട കവര് ഒട്ടിച്ച ശേഷം കവര് മെറ്റല് ഡ്രോപ്പ് ബോക്സില് നിക്ഷേപിച്ചു.
സംസ്ഥാനത്തെ ആദ്യ നിയമസഭാ തെരഞ്ഞെടുപ്പില് വോട്ട് രേഖപ്പെടുത്തിയിട്ടുള്ള ഇവര് കാസര്കോട് ജില്ലയിലെ ഏറ്റവും പ്രായം കൂടിയ വോട്ടറാണ്. വോട്ടെടുപ്പ് നടപടികള് നിരീക്ഷിച്ച ജില്ലാ കളക്ടര് കെ.ഇമ്പശേഖര് കുപ്പച്ചിയമ്മയെ ആശംസയറിയിച്ച് പൂച്ചെണ്ട് നല്കി. കളക്ടറെ തിരിച്ചറിഞ്ഞപ്പോള് കുപ്പച്ചിയമ്മ സന്തോഷം പങ്കിട്ടു. വീട്ടിലെ വോട്ടിന് സാക്ഷിയാകാന് രാഷ്ട്രീയ കക്ഷി പ്രതിനിധികളും അയല്വാസികളും എത്തിയിരുന്നു.
അയല്വാസി കാരിച്ചി നെല്കതിര് ചെണ്ട് നല്കി ജില്ലാ കളക്ടറെ സ്വീകരിച്ചു.കാഞ്ഞങ്ങാട് മണ്ഡലം ഹോം വോട്ട് സ്പെഷല് ഓഫീസര് ജില്ലാ ടൗണ് പ്ലാനര് ലീലിറ്റി തോമസ്, ഒന്നാം പോളിംഗ് ഓഫീസര് കൃഷ്ണനായിക്, രണ്ടാം പോളിംഗ് ഓഫീസര് സുബിന് രാജ്, മൈക്രോ ഒബ്സര്വര് എസ്.കെ.മഹേഷ്ലാല്, ബൂത്ത് ലെവല് ഓഫീസര് മൊയ്തു, ജില്ലാ ഇന്ഫര്മേഷന് ഓഫീസര് എം.മധുസൂദനന്, വിവിധ രാഷ്ട്രീയ കക്ഷിപ്രതിനിധികള് എന്നിവര് പങ്കെടുത്തു.
