തിരുവനന്തപുരം: ശ്രീപത്മനാഭ സ്വാമി ക്ഷേത്രത്തില്‍ പത്ത് ദിവസം നീണ്ടു നില്‍ക്കുന്ന പൈങ്കുനി ഉത്സവത്തിന് ഇന്ന് കൊടിയേറി. രാവിലെ 8.45നും 9.30നും ഇടയ്‌ക്കാണ് കൊടിയേറ്റം നടന്നത്. ക്ഷേത്ര തന്ത്രിമാരായ ഗോവിന്ദന്‍ നമ്പൂതിരിപ്പാട്, പത്മനാഭന്‍ നമ്പൂതിരിപ്പാട് എന്നിവരുടെ മുഖ്യകാര്‍മികത്വത്തിലാണ് കൊടിയേറ്റ ചടങ്ങുകള്‍ നടന്നത്. 19ന് വലിയകാണിക്കയും 20ന് പള്ളിവേട്ടയും നടക്കും. 21ന് ശംഖുംമുഖം കടപ്പുറത്ത് ശ്രീപത്മനാഭ സ്വാമിയുടെ ആറാട്ടോടുകൂടി ഉത്സവത്തിന് സമാപനമാകും.
ശ്രീപത്മനാഭസ്വാമി ക്ഷേത്രത്തിലെ വാര്‍ഷിക ഉത്സവങ്ങളില്‍ ആദ്യത്തേതാണ് പൈങ്കുനി ഉത്സവം. മീനമാസത്തിലെ രോഹിണി നാളില്‍ കൊടിയേറ്റോടു കൂടി തുടങ്ങി പത്താം ദിവസം അത്തം നാളില്‍ ആറാട്ടോടുകൂടി സമാപിക്കുന്ന ഉത്സവമാണ് പൈങ്കുനി ഉത്സവം. ക്ഷേത്രത്തിന്റെ കിഴക്കേനടയില്‍ പാണ്ഡവന്മാരുടെ അഞ്ചു വലിയ പ്രതിമകള്‍ ഉത്സവനാളുകളില്‍ ഉയരും. മഴയുടെ ദൈവമായ ഇന്ദ്രനെ പ്രസാദിപ്പിക്കാനാണ് ഇതെന്ന് വിശ്വസിക്കുന്നു.
ഒമ്പതാം ദിവസം തിരുവിതാംകൂര്‍ രാജവംശത്തിലെ ഏറ്റവും മുതിര്‍ന്ന അംഗം പള്ളിവേട്ടയ്‌ക്കു പുറപ്പെടും. കിഴക്കേക്കോട്ടയിലെ വേട്ടക്കൊരുമകന്‍ ക്ഷേത്രത്തിലേക്കാണ് ഈ എഴുന്നള്ളത്ത്. പത്താം ദിവസം ആറാട്ടിനായി ശംഖുമുഖം കടല്‍ത്തീരത്തേക്ക് പത്മനാഭസ്വാമിയുടെ ആറാട്ടെഴുന്നള്ളത്ത് നടക്കും. തിരുവിതാംകൂര്‍ കൊട്ടാരത്തിലെ മുതിര്‍ന്നഅംഗം ആചാര, അലങ്കാര വിശേഷങ്ങളോടെ പള്ളിവാളേന്തി ആറാട്ടു ഘോഷയാത്രയില്‍ പങ്കെടുക്കും. പുരുഷന്മാരായ എല്ലാ രാജകുടുംബാംഗങ്ങളും ഈ ആറാട്ടുഘോഷയാത്രയില്‍ അണിനിരക്കുന്നത് നൂറ്റാണ്ടുകളായുള്ള ആചാരമാണ്.
പ്രതികരിക്കാൻ ഇവിടെ എഴുതുക: