കണ്ണൂര്: രാപ്പാടി തന് പാട്ടിന് കല്ലോലിനി… രാഗാര്ദ്രമാം ദിവ്യ കാവ്യാഞ്ജലി… കണ്ണൂര് വാരം യുപി സ്കൂളില് നടന്ന ബിജെപി കുടുംബ യോഗത്തില് ഇരുകണ്ണുകള്ക്കും കാഴ്ചയില്ലാത്ത അനന്യ മനോഹരമായി ഗാനമാലപിച്ചപ്പോള് ഭാഷ അറിയില്ലെങ്കിലും പരിപാടി ഉദ്ഘാടനം ചെയ്യാന് എത്തിയ ബിജെപി ദേശീയ നിര്വാഹക സമിതിയംഗം പ്രകാശ് ജാവദേക്കറുടെ കണ്ണുകള് നനഞ്ഞു. പാട്ട് കഴിഞ്ഞു അനന്യയെ ചേര്ത്തുപിടിച്ച ജാവദേക്കര് പറഞ്ഞത് ഞാന് ഈ പാട്ടുകള് മോദിജിക്ക് അയച്ച് കൊടുക്കും. ഇനി അദ്ദേഹവും ഈ പാട്ടുകള് കേള്ക്കും.
കൃത്യമായി മലയാളമറിയില്ലെങ്കിലും നിരവധി വേദികളില് പാട്ടു പാടിയ തനിക്ക് കിട്ടുന്ന ഏറ്റവും വലിയ അംഗീകാരമാണ് പ്രകാശ് ജാവദേക്കര് പങ്കെടുക്കുന്ന വേദിയില് പാടാന് കഴിഞ്ഞതും അദ്ദേഹം തന്ന അംഗീകാരമെന്നും അനന്യ പറഞ്ഞു. സാധാരണ കുടുംബത്തിലെ അംഗമായ അനന്യ ‘വെള്ളം’ എന്ന സിനിമയില് പാടിയിട്ടുണ്ട്.
അതോടൊപ്പം തന്നെ സംസ്ഥാന സ്കൂള് കലോത്സവത്തില് കന്നട പദ്യം ചൊല്ലലിനും മാപ്പിളപ്പാട്ടിനും എ ഗ്രേഡ് ലഭിച്ചിട്ടുണ്ട്. വാരത്തെ പുഷ്പന്-പ്രജിത ദമ്പതികളുടെ മകളായ അനന്യ എളയാവൂര് സിഎച്ച്എം ഹയര് സെക്കന്ഡറി സ്കൂളിലെ എട്ടാം ക്ലാസ് വിദ്യാര്ത്ഥിയാണ്. എളയാവൂര് സിഎച്ച്എം സ്കൂളിലെ അദ്ധ്യാപകനായ വിനയചന്ദ്രനാണ് അനന്യയെ സംഗീതം പഠിപ്പിക്കുന്നത്. സഹോദരി അതുല്യ ശ്രീശങ്കരാചാര്യ കമ്പ്യൂട്ടര് ഇന്സ്റ്റിറ്റിയൂട്ടില് ഡിസിഎ വിദ്യാര്ത്ഥിയാണ്.
