ന്യൂദല്ഹി: തെരഞ്ഞെടുപ്പിന് മുമ്പ്, യൂട്യൂബില് ആരോപണങ്ങള് ഉന്നയിക്കുന്ന എല്ലാവരെയും ജയിലിലടയ്ക്കാന് തുടങ്ങിയാല് എത്രപേരെ ജയിലിലടയ്ക്കുമെന്ന് സുപ്രീംകോടതി.
തമിഴ്നാട് മുഖ്യമന്ത്രി എം.കെ. സ്റ്റാലിനെതിരെ അപകീര്ത്തികരമായ പരാമര്ശം നടത്തിയെന്ന കേസില് യൂട്യൂബറുടെ ജാമ്യം റദ്ദാക്കിയ മദ്രാസ് ഹൈക്കോടതി ഉത്തരവിനെതിരായ ഹര്ജി പരിഗണിക്കുകയായിരുന്നു കോടതി. സോഷ്യല് മീഡിയയില് ആരോപണങ്ങള് ഉന്നയിക്കുന്ന എല്ലാവരെയും ജയിലിലടയ്ക്കാനാകില്ലെന്ന് കോടതി പറഞ്ഞു. ജസ്റ്റിസ് അഭയ് എസ്. ജസ്റ്റിസ് ഓക, ഉജ്ജല് ഭൂയാന് എന്നിവരടങ്ങിയ ബെഞ്ചാണ് ഹര്ജി പരിഗണിച്ചത്.
എ. ദുരൈമുരുഗന് സട്ടായി എന്ന യൂട്യൂബര്ക്കെതിരായാണ് കേസെടുത്തിരുന്നത്. ജാമ്യം ലഭിച്ച് കോടതിയില് സത്യവാങ്മൂലം നല്കിയതിന് തൊട്ടുപിന്നാലെ ദുരൈമുരുഗന് തമിഴ്നാട് മുഖ്യമന്ത്രിക്കെതിരെ വീണ്ടും അപകീര്ത്തികരമായ പരാമര്ശങ്ങള് നടത്തിയെന്ന നിരീക്ഷണത്തെ തുടര്ന്നാണ് മദ്രാസ് ഹൈക്കോടതി ജാമ്യം റദ്ദാക്കിയത്. ഒരു പ്രസ്താവന അപകീര്ത്തികരമാണോ അല്ലയോ എന്ന് ആരാണ് നിര്ണയിക്കുകയെന്ന് ജസ്റ്റിസ് ഓക തമിഴ്നാടിനുവേണ്ടി ഹാജരായ മുതിര്ന്ന അഭിഭാഷകന് മുകുള് റോത്തഗിയോട് ചോദിച്ചു. ജാമ്യത്തിലിരിക്കെ അപകീര്ത്തികരമായ പരാമര്ശങ്ങള് നടത്തരുതെന്ന് സട്ടായിയോട് നിബന്ധന വെക്കണമെന്ന അപേക്ഷയും സുപ്രീംകോടതി പരിഗണിച്ചില്ല.
ജാമ്യം റദ്ദാക്കാനുള്ള കാരണങ്ങളൊന്നും കണ്ടെത്താതിനാല് ജാമ്യം റദ്ദാക്കിയ ഹൈക്കോടതി ഉത്തരവ് റദ്ദാക്കുകയും ജാമ്യം അനുവദിച്ച ഉത്തരവ് പുനഃസ്ഥാപിക്കുകയും ചെയ്യുകയാണെന്നും കോടതി പറഞ്ഞു. 2021 ഒക്ടോബറിലാണ് പരാതിയുടെ അടിസ്ഥാനത്തില് പോലീസ് കേസെടുത്ത് മുരുഗനെ അറസ്റ്റുചെയ്തത്. നവംബറില് മദ്രാസ് ഹൈക്കോടതി മുരുകനു ജാമ്യം അനുവദിച്ചു. പിന്നീട് ഹൈക്കോടതി ഡിവിഷന് ബെഞ്ച് ജാമ്യം റദ്ദാക്കി. എന്നാല്, 2022ല് സുപ്രീംകോടതി മുരുഗന് ഇടക്കാല ജാമ്യം അനുവദിച്ചിക്കുകയായിരുന്നു.
