ന്യൂദല്ഹി: ഫോബ്സ് ബില്യണയര് ഇന്ഡക്സ് 2024 പട്ടികയില് നിന്ന് ബൈജൂസ് എജ്യുടെക് സ്റ്റാര്ട്ടപ്പിന്റെ സ്ഥാപകനായ ബൈജു രവീന്ദ്രന് പുറത്ത്. ബൈജുവിന്റെ ആസ്തി പൂജ്യം എന്നാണ് പട്ടികയില് രേഖപ്പെടുത്തിയിരിക്കുന്നത്.
ചരിത്രത്തിലാദ്യമായി 200 ഭാരതീയരെ ഉള്പ്പെടുത്തിയുള്ള പട്ടികയാണ് ഫോബ്സ് ഇത്തവണ പുറത്തിറക്കിയത്. കുറച്ചുനാളുകള്ക്ക് മുമ്പുവരെ ലോകത്തിലെ ഏറ്റവും വലിയ സമ്പന്നരുടെ പട്ടികകളില് പലതിലും ഇടംപിടിച്ചിരുന്ന ബൈജു ഇത്തവണത്തെ ഫോബ്സ് പട്ടികയില് ഇല്ലെന്നതാണ് എല്ലാവരുടെയും ശ്രദ്ധയാകര്ഷിച്ചത്.
2022ല് 22 ബില്യണ് ഡോളറായിരുന്നു ബൈജുവിന്റെ കമ്പനിയുടെ മൂല്യം. കഴിഞ്ഞ വര്ഷം 17,545 കോടിയായിരുന്നു ആസ്തി. അടുത്തകാലത്ത് ബൈജൂസ് നേരിട്ട കടുത്ത പ്രതിസന്ധികളാണ് ആസ്തിയെ ബാധിച്ചത്. ബൈജൂസിന്റെ മാതൃകമ്പനിയായ തിങ്ക് ആന്ഡ് ലേണില് നിക്ഷേപം ഉണ്ടായിരുന്ന ബ്ലാക്ക് റോക്ക് എന്ന സ്ഥാപനം ജനുവരിയില് അവരുടെ ഓഹരിമൂല്യം വെട്ടിക്കുറച്ചു. ഫെബ്രുവരിയോടെ ഓഹരി ഉടമകള് ബൈജുവിനെ കമ്പനിയുടെ സിഇഒ സ്ഥാനത്തു നിന്ന് നീക്കി. ഈ ആഴ്ച മാത്രം കമ്പനി പിരിച്ചുവിട്ടത് 500 പേരെയാണ്. 2022ലെ കണക്കുകള് പ്രകാരം ഒരു ബില്യണ് ഡോളറിലധികമാണ് കമ്പനിയുടെ നഷ്ടം.
